Ttawilat akk, ttwaheggan akken ilaq i lmend n tuɣalin ɣer wammasen yerzan asileɣ d uselmed asadar (professionnelle), ara d-yilin deg wass wis 23 cutamber i d-iteddun, i d-iwekked uneɣlaf n usileɣ asadar, Mohamed Mebarki, deg yiwet n tdiwennit i Tnegga n yisallen n Lezzayer (APS). Dɣa deg lwilaya n Tizi Uzzu, i lmend n tuɣalin-agi ɣer yisɣuren n useḥfeḍ n lḥurfat, ttwajerden wugar n 300 n yimunan imaynuten, ara ixedmen asileɣ ɣef teɣzi n useggas deg yisɣuren n usileɣ asadar i yellan deg lwilaya n Tizi Uzzu. Si tama-s, iger-d tiɣri unemhal n usileɣ akked uselmed asadar, Rachid Louhi, i yilmeẓyen i wakken ad qesden tuddsa-agi, ara asen-ineǧren abrid n uxeddim. Ugar n 76 n tuzzagin (spécialités) ideg zemren ad fernen yilmeẓyen i ijerden iman-nsen deg wunuɣen n usileɣ i useggas-agi amaynut 2018-2019. Ajerred yebdan seg wass-nni n 15 yulyu ad yessali ass n ssebt 15 deg cutember-agi ideg nella. Ma ɣef umaynut n tuɣalin-agi, yenna-d Mass Rachid Louhi : « Nesnulfa-d 9 n tuzzagin timaynutin ara yettwaslemden seg wass amenzu n tuɣalin-agi n useggas-agi 2018-2019 ». Am wakken daɣen ara llin tiwwura-nsen kra n yisɣuren-nniḍen deg wussan-agi i d-iteddun, gar-asen : Sin-nni n wammasen imaynuten, yiwen deg Azeffoun wayeḍ deg Oued Falli, ɣer tama n tlata n tnawalin n 100 n yimukan i wammasen-agi : win n Sidi Naamane, win n Beni Yenni akked win Tizi Gheniff. Ussan n ufran n yiḥafaḍen-agi, ad ilin ass n 16, 17 akked 18 cutember 2018, ma d ass unṣib n unekcum, ad yili ass n lḥed 23 cutember i d-iteddun.
G. A.