Accueil Tamazight Nna Ḥedda, tameqqrant n Ayt Smaɛel

Nna Ḥedda, tameqqrant n Ayt Smaɛel

590
- PUBLICITÉ -

Tamɣart n tɣiwant n Ayt Smaɛel, 65 n yikilumitren ɣer unẓul-asamar n Bgayet, d Nna Ḥedda n Ayt Uggaɛrab n Ayt Ɛmer d Ḥmed s yisem-is aqbayli, neɣ Ɛerfi s yisem-is amiran n tedbelt. Deg yixef-is tura akka tasut (lqern) d 11 n yiseggasen, imi tlul ass n 9 furar 1907, deg tallit-nni ideg tamhersa tafransist tḥuza aṭas n yiḥricen d taɣulin deg tudert n yimesdurar. Mi nerza ɣur-s, nemmeslay yid-s, ugar n terẓen n leɛqel-is i mazal deg umḍiq-is, ɣas iɛedda zzman, tban-d Nna Ḥedda tessen amek ara tessefti awal, neɣ amek ara tqesser s ucmummeḥ mi ara as-yehwu. S ccfawa-nni i tekseb, tessawaḍ, tettuɣal i yizri yeggugen akken ad aɣ-d-tmel kra seg umezruy n Ayt Smaɛel abeɛda, d tudert tamzikt i tuɣ ttidiren. Ula mi d-yettwawi wawal ɣef tallit tamirant, tatrara d kra n leɛwayed i d-ikecmen, tesḥassef ayendin Nna Ḥedda. Awal sin ad d-tini: « Nekni zik mačči akka », nettat tettḥerrik ifassen-is akkin akka. Tban-aɣ-d daɣen, tugad ula ɣef tsuta i d-iteddun, amek ara tili, ara tidir. Ula d ccfawat n tallit n tegrawla, mazal resxent deg uqerruy-is imi, akken yebɣu yili, yewɛer lbaṭṭel i tatut. Ɣas ma tura teǧǧa-tt tezmert n yiḍarren d yiɣallen, isul tesɛa Nna Ḥedda kra n tezmert deg wallaɣ-is ɣas teḥḍer i waṭas n tsutwin, ɣas buhan i iɛeddan fell-as. Nessaram-as dɣa ad tdum, ad teɣzif tudert-is i wid akk i tt-iḥemmlen.

- PUBLICITÉ -

M. K.

- PUBLICITÉ -