Accueil Tamazight Wiss anda n Amour Abdenour

Ajdid deg ccna : Wiss anda n Amour Abdenour

683
- PUBLICITÉ -

Yessufeɣ-d ussan-a unaẓur Ɛemmur Ɛebdennur aḍebsi d amaynut n ccna i izewwel «Wissen anda », ideg i d-yewwi kra n yisental i nezmer ad d-nini ṭṭuqten, s uɣanib-is netta. Deg tezlit tamezwarut dɣa, amzun yewwi-d ɣef tayri s wudem n lxiq. Am usmekti n tin akken iwumu yenna «lɣiba-m terwi allaɣ». Deg tezlit i d-iḍefren s uzwel n “Ad kem-zzmen” , d ameslay ɣef tayri n yiwen n yizri, amzun ugar n tujjma, deg-s daɣen kra n ccwami. Deg-s, abeɛda, ibedder-d ucennay s waṭas «Ul iḥemmlen». Ayen i d-yusan deg taɣect tis kraḍ, nezmer ad d-nini d tuzzma n yiman ɣef wayen yeḍran, d wayen i izemren ad d-yekk ala seg yimdanen. S useqdec n kra n wallalen i nennum deg tezlatin-is, am ubendir d tjawwaqt, yeqqar Ɛemmur Ɛebdennur deg ufyir wis sin: «Aql-iyi ɣef tɣaltin, umneɣ tikerkas, win iɛeddan yeǧǧa-yi din, beddeɣ am uɛessas…». Seg usmuzget n tezlit tis ukuẓ, s uẓawan i d-yezgan i yimeslayen, iban-d yewwi-d awal unaẓur ɣef waddad n tmetti taqbaylit abeɛda. «Nɣil d lmendad, nezga-d ɣef wayen i d-yeǧǧa bab-is, d lǧehd n uḥeddad, yettruẓun uzzal s yifadden-is», i nezmer ad nsel. Ahat d azɣan n unaẓur ɣef wayen i as-d-yezzin, s tɣara-s netta. Srid deffir-s, tusa-d tezlit ideg i yerra yis-s tajmilt s wazal-is, i win iwumi yenna: «Wiss anda trekkuḍ, wis anda teɣliḍ, asmi akken tettedduḍ, tettcerrigeḍ abriḍ, i yewɛer wakud, ass-a yekkes-aɣ lqid, ttun-k ur tettsuḍ, widak tettawiḍ». Syin akkin, ahat d tajmilt daɣen, neɣ d abdar n temnaḍt n Sidi Ɛic i ara naf deg tezlit tis 6. Deg-s s umata, icekker-d agama-s yelhan d yirgazen ufhimen i d-tessufeɣ. Deg tezlit-nniḍen, send taneggarut, d tiririt n wazal i tmussni, s ubdar n ubrid-nni n uɣerbaz akked usendeh i ulmad d tɣuri deg wakud. Ɣer taggara, d akemmel n usentel-a n tmussni akken-nniḍen, imi yecna ɣef tegzi (lefhama), ideg yeqqar: «Anida ulac lefhama, trewwel lewqama». Neɣ daɣen: «Anda ulac wid ifehmen, tarewla temneɛ bab-is».

- PUBLICITÉ -

M. K.

- PUBLICITÉ -