Tulya tunṣibt n useggas asdawan amaynut deg lwilaya n Tizi Uzzu, tella-d tasebḥit n wass-nni n lḥed yezrin 16-09-2018, seg tmazdayt n yizerfan d tmussniwin n tsertit n Boukhalfa. D imḍebber amezwaru n tesdawit n Tizi Uzzu Mass Ahmed Tessa, i d-yellan ɣef lmendad n tulya-agi, ɣer tama n lwali Mass Bouderbali akked uselway n Useqqamu aɣerfan n lwilaya n Tizi Uzzu Mass Aouchiche. Azal n 9 400 n yisdawen imaynuten i ikecmen tasdawit n Mulud Mɛemmeri n Tizi Uzzu, ass-nni n lhed iɛeddan, i lmend n useggas-agi asdawan amaynut 2018-2019. Iberreḥ-d imḍebber amezwaru n tesdawit n Tizi Uzzu, Mass Tessa Ahmed, yenna-d: “Uṭṭun n yisdawen ijdiden i d-ikecmen ɣer tesdawit n Mulud Mɛemmeri, i tuɣalin-agi n 2018-2019, akka tura, yewweḍ ɣer 9 400 n yisdawanen, maca yezmer ad yaweḍ alamma d 10 000 n yisdawanen, imi mazal tallit n uɛiwed n tmuɣli (recours) n uceggeɛ n yinelmaden”. I kemmel yenna-d: “ Yenqes wuṭṭun-agi ɣef useggas iɛeddan, imi ilindi 10 800 n yinelmaden i d-ikecmen, ma d aseggas-agi tasiɛt-agi ala 9 400 i yettwajerden”. D timazdayin n tujjya akked tin n yizerfan d tmussniwin n tsertit, i yuɣalen d timezwura ɣer leqraya, imi ur sɛant ara agellel (retard). Dɣa yenna-d: “Sya ɣer taggara n waggur-agi n cutember, ad yaweḍ ugemmuḍ n yinelmaden ara yuɣalen ɣer tzeɣwa-nsen, ɣer 80%. Ma ɣer tazwara n waggur n tuber, ad nessiweḍ ɣer 100%. Yefka-d diɣ uṭṭunen yerzan tasdawit n Tizi Uzzu s umata, ideg i d-iberreḥ s wuṭṭun n 6 000 n yisdawen i yeffɣen tasdawit s yigerdasen-nsen aseggas-a. Am wakken daɣen i tekseb tesdawit n Mulud Mɛemmeri ugar n 60 000 n yinelmaden, yettwaferqen akka: Gar-asen 4 000 ar 5 000 n tmazdayt n yizerfan, 12 000 n tmazdayt n tmussniwin n tdamsa, 10 000 n yinelmaden n tmazdayt n tutlayin d tsekliwin, 10 000 wiyaḍ n tmazdayin n tmussniwin n talsa d tmetti. Yettili-d ɣef lmenda-d nsen wugar n 2 200 n yiselmaden akked 2 300 n yixeddamen. Ma ɣef tegnatin ideg yetturaǧu ad iɛeddi useggas-agi amaynut, yenna-d: “Tignatin merra ttwaheggant, 2 700 n yimukan isensegman imaynuten i yettwaheggan deg Tamda ɣer tama n 4 300 yellan yakan, i mazal ur kfin ara lecɣalel-nsen, i yetturaǧun ad wejden sya ɣer taggara n useggas-agi”. Ikemmel yenna-d: “Ulamma asnuded (grève) d azref n yisdawanen, maca ilaq ad tettili kan ma ulac tameẓẓuɣt ara asen-yeslen neɣ ulac tifrat i wuguren-nsen”. I usemekti kan, tasdawit n Mulud Mɛemmeri n Tizi Uzzu, tekseb 12 n taɣulin ideg i d-yettili ugerdas n doctorat, 145 n taɣulin n usileɣ deg master akked 83 deg turagt (licence).
Azal n 3 532 n yisdawen i ikecmen tasdawit n Tubiret
Ula d tasdawit n Akli Muḥend u Lḥaǧ n Tubiret, tella deg ttiɛad n tuɣalin n yinelmaden ɣer tesdawit i lmend n useggas asdawan amaynut 2018-2019. Azal n 3 532 n yinelmaden i d-yewwin akayad n Bac, ttwajerden deg 11 n tuzzagin (spécialités) i tekseb tesdawit n Tubiret, d uṭṭun i d-yefka wulɣu n tesdawit-agi. Am wakken daɣen i ttwaqeblent wazal n 59 n tuttriwin n ubeddel ɣer tesdawit-agi, ɣer tama n 57 n tuttriwin-nniḍen n ubeddel i d-yellan ɣer tesdawiyin-nniḍen n tmurt. Am wakken diɣ, i ttwaqbalent 91 n tuttriwin n ubeddel gar yigezda n tesdawit-agi, mebɛed mi beddlen yinelmaden-agi afran-nsen.
Ugar n 265 000 n yinelmaden imaynuten i ikecmen ɣer tesdawit deg wakal aɣelnaw
Ugar n 265 000 n yinelmaden imaynuten i ikecmen ass-nni n lḥedd, 16-09-2018, ɣer tesdawiyin n tmurt, i lmend n useggas asdawan 2018-2019, i yessawḍen aseggas-agi ɣer umḍan n 1,7 n yimelyan di yakk annagen uselmed asdawan yellan deg tmurt merra. Isdawanen-agi s umata, ttwaferqen ɣef 50 n tesdawiyin, 13 n wammasen isdawanen, 32 n yiɣerbazen unnigen, 11 n yiɣerbazen uselmed akked 51 n yiɣerbazen yeqqnen ɣer yiḥricen-nniḍen n Uɣlif n uselmed unnig d unadi ussnan ɣer tama n wazal n 9 yiɣerbazen n uḥric uslig (double) . I lmend n unekcum-agi asdawan 2018-2019, akk ttawilat d wallalen ttwasǧehden armi ssawḍen 1.452,000 imeḍqan n walmud. Annect-agi, yella-d deffir uheggi n wazal n 67.100 imeḍqan imaynuten akk d wazal n 45.500 imṭeṛḥen ijdiden, ayen ara yessiwḍen ɣer wazal n 629.500 imeṭṛaḥen, akked wugar n seddis (06) n yiseččuyen ilemmasen (restaurant central ) i d-yellan deg wammasen isdawanen imeqqranen.
Ghani Amazigh