Agezdu n tutlayt d yidles n tmaziɣt n tesdawit n Akli Mohand Oulhadj n Tubiret yemmugger-t-id wugur n lexsas n yiselmaden deg unekcum asdawan amaynut 2018-2019. Uṭṭun n yinelmaden yettnerni s waṭas seg useggas ɣer wayeḍ, d ayen yeǧǧan uṭṭun-nsen yugar s waṭas win n yiselmaden, armi ur ssawḍen ara akken ad d-qidden i yisdawanen yeqqaren. D annect-agi, i yeǧǧan imḍebbren n tesdawit-agi, ad mtawan akked tenmehla n usegmi n lwiaya n Tubiret, i wakken ad fken tagnit i yiselmaden n tmaziɣt ad seddun timsirin n tutlayt tamaziɣt deg ugezdu n tmaziɣt. Am wakken daɣen, ara d-yili usejhed d usnerni n wuṭṭun n yiselmaden, gar wid yeqqaren deg useggas wis sin n ugerdas n Master ɣer tama n widak ittkemmilen almud deg Doctorat, ara d- yelhin s uselmed n timsirin n usluɣmu (TD). D 116 i d uṭṭun amatu n yiselmaden i yetturaǧun ad d-rnun ɣer wid yellan yakan. Ɣer taggara, ad nesmekti kan belli ugar n 130 n yinelmaden imaynuten i d-yettwaceggɛen ɣer ugezdu-agi seg ddeqs n tamiwin n tmurt. Agezdu-agi, yettwaxelq-d d wis tlata deg useggas n 2009, mbeɛd winna n Tizi Uzzu akked winna n Bgayet.
Ghani. A.