Deg tdiwennit-a, yemmeslay-d Samir Arkam ɣef umecwar-is deg uḥric-agi n uẓawan akked uɣerbaz-is amaynut ara yeldin tiwwura-s deg ussan-a.
Aɣmis n Yimaziɣen : Anwa-t Samir Arkam ?
Samir Arkam : Nekk d aselmad n uẓawan i iḥemlen akk ayen i icudden ɣer ccna. Ttnaleɣ akk aẓawan n ddunit. Aya, yekka-d seg yidammen-iw, ma nezmer ad d-nini akka. Seg wasmi lliɣ d ameẓyan, ḥemmleɣ ad sleɣ i uẓawan. Syin akin, ɣri-t u sselmadeɣ-t akka tura. Slemdeɣ aẓawan deg Uxxam n yidles Mulud Mɛemmeri akked deg yiɣerbazen. Aql-i, daɣen, chef-d ’orchestre.
D acu n lesnaf n uẓawan i tḥemmleḍ neɣ i tesselmadeḍ ?
Nekk s timmad-iw, ḥemmleɣ akk lesnaf n uẓawan. Ma ɣef wayen yeɛnan aselmed, xeddmeɣ i yinelmaden-iw timsirin n uẓawan aklasiki, ccaɛbi akked ccerqi…Am wakken i d-ttiliɣ deg lmendad i kra n trebbuyaɛ n ccna.
Deg taggara-a, ha-t-an ad teldiḍ aɣerbaz n uẓawan deg Tizi Uzzu. Ma tzemreḍ ad d-temmeslayeḍ ɣef yiswiyen n usenfar-a ?
Ad yeldi uɣerbaz-a n uẓawan tiwwura-s s wudem unṣib ass n ssebt, 29 deg cutember 2018. D aɣerbaz ara yesselmaden aẓawan aklasiki s umata. Aya, ad yili s uselmed n wurar n waṭas n wallalen, yecban tagitart, apyanu, tijewwaqin, …atg. Am wakken ara yili, diɣ, ccna.Yusa-d waya d tirirt i yilem yellan deg tmetti : Aṭas n wid yebɣan ad ɣren aẓawan, neɣ ad ḥeffḍen allalen n uẓawan, maca ur ufin anda. Ihi, nezmer ad d-nini nerra-d i teɣri-nsen. Ɣef wanect-a, dɣa, aṭas n yimdanen i yi-d-yesbeɣsen u ffkan-iyi-d afus n tallelt. Bɣiɣ kan ad d-rnuɣ belli iselmaden n uɣerbaz-a, d iselmaden igerrzen i yessnen amahil-nsen. Llan wid n Tizi Uzzu, llan wid i d-yusan seg Lezzayer tamaneɣt.
Membla ccek, ad ilin aṭas n warrac imeẓyanen ara ilemden deg uɣerbaz-a. Ma tzemreḍ ad d-tesmektiḍ azal yesɛa uẓawan ɣef tnefsit n ugrud dɣa ?
D tidet, aṭas n warrac i ijerden iman-nsen akka tura i wakken ad lemden aẓawan. Akken neẓra, yesɛa uẓawan lfayda meqqren ɣef tnefsit n umdan, mačči kan ɣef umecṭuḥ. Deg wayen yeɛnan lfayda n yinelmaden, ad naf yesnefsusiy taɛkemt i yettbibbi yiqerra-nsen, iteldi-asen allaɣ. S umata, aẓawan d ttrebga. Llan kra n yibabaten deg tmura tiberraniyin, ttetuqelliqen kter ɣef tezmilt n uẓawan mi ara d-tṣubb wala ɣef tezmilin n tangiwin-nniḍen. Qqaren mi ara d-tṣubb tezmilt n uẓawan, yella d acu i iceɣben anelmad-nni. Ihi, lfayda n uẓawan meqqret mačči d izli.
Ahat, ad ilin yicennayen sya d afella ara d-yeffɣen seg uɣerbaz-agi-inek. Wigi, ad mgaraden d wid n tura imi ad ilin lemden aẓawan. S wacu dɣa ara mgaraden ?
Wid ara d-yeffɣen deg uɣerbaz, ad issinen ad arun u ad ɣren aẓawan. Ihi, zemren ad arun aẓawan n tezlatin-nsen. Syin, ad gzun azal n ccna s umata. Ur xeddmen ara kan tizlatin n menwala. Ad as-ffken azal-is akked rruḥ-is i uẓawan. Zemmren ad aɣen abrid n Cherif Kheddam, Iguerbouchène d wiyaḍ. Acu kan, mačči win yeɣran aẓawan, dɣa ad d-yeffeɣ d anaẓur mechuren, neɣ win ur neɣri ara aẓawan, ur yezmir ara ad yecnu akken iwata. Matoub, Ait Menguellet, Zeddek d wiyaḍ mačči deg uɣerbaz n uẓawan i d-ffɣen.
Awal n taggara
Ssarameɣ ad yuɣal uɣerbaz-a sya d afella d conservatoire de musique. Ad iniɣ tanemmirt i wid akk i yi-d-yefkan afus n tallelt, Axxam n yidles Mulud Mɛemmeri, Axxam n umezgun kateb Yacine… akked Uɣmi n Yimaziɣen n La Dépêche de Kabylie.
Yesteqsa-t Hocine Moula