Ad d-tili tezrigt tamezwarut n Unmuggar n tgemmi tadelsant tamensayt tarangant (immatériel) deg Tizi Uzzu gar 26 d 27 cutember 2018 anda ara terr tajmilt i temlilt n tmeṭṭut tazzayrit, yesɛan azal meqqren deg uḥraz n tgemmi taɣelnawt, ɣef wakken i d-tenna, ass n lexmis, tenmehla tadigant n yidles. Ad d-tili rreḥba-agi s usentel «Tigemmi tadelsant gar tnaṣlit d uzzewzel », ideg ara yezzi wawal ɣef tmeṭṭut tazzayrit d taneḍmant n usɛeddi n tgemmi tadelsant tarangant. Ad ssuddsen timlilit-a deg Uxxam n yidles n Mouloud-Mammeri. Ad tili d tagnit i usmekti s temlilit n tmeṭṭut u ad d-tili deg-s temsikent n ufexxar, iceṭṭiḍen, asewwi d yimrisen-nniḍen ay ttgent tlawin. Ad d-tili diɣ d tajmilt i umnadi d umussnaw Youcef Nacib. Ad rren daɣ tajmilt i « Urar n lxalat » n Ṛṛadyu Tis Snat, i yellan d agraw n tlawin i igan leqrar d leqdar i ccna aɣerfan n tlawin s yiwet n tesgilt n ṛṛadyu yettwassnen s yisem-a. Urar-agi, ttekkan deg-s kra seg yismawen imeqqranen n ccna aqbayli aɣerfan, yecban Lǧida tamecṭuḥt, Anissa, Djamila d Cherifa…atg. Ad d-yili daɣ uskan n urqam n ufexxar s yizamulen imaziɣen, timucuha d wuraren insayanen, ihanayen n ccna n tsednan d uskan n tmeɣra tansayant. Ad gen daɣ isaragen d temsikniyin ideg ara ttekkin yimazzagen am Galez Ouiza, d tamnadit deg Wammas Aɣelnaw n yinadiyen izarmezruyanen, Fairouz Recham n tesdawit n Tubiret, d Zahia Ben Abdellah. Am wakken diɣen ara d-ilin leqdicat-nniḍen idelsanen, ara yeddun ɣef teɣzi n sin wussan.
A. A.