Yeffeɣ-d ussan-a di teẓrigin timaynutin Ccix Muḥend Ulḥusin wammud n yisefra amezwaru n tmedyazt Lidya n Ǧerǧer, yelli-s n Tizi Uzzu.
D azwel « Urfan n tsusmi » i tefren ad d-yettmeslay si berra ɣef tḥawact n udlis-a i yettawin azal n 92 n yisebtar, d wugar n 39 n yisefra. Akka i tenwa Lidya tilemẓit, ad tebḍu iḥulfan d tektiwin-ines akked yimeɣriyen ɣef waṭas n tlufa n tudert, imi ula d azwel yeskan-d, ulamma kra, amek tdekker tsusmi i d-yeffɣen d isefra. «Feṛḥeɣ s udlis-a , ttḥulfuɣ s lebɣi meqqren i wakken ad kemmleɣ deg ubrid n tira, ulamma bdiɣ-tt deg useggas 1987 mazal-iyi deg-s ar ass-a», i aɣ-d-tenna lal n wammud-a, Massa Lidya n Ǧerǧer. Send ad d-ternu daɣ: « Ɣur-i akka tura 670 d asefru. Isentel i yellan deg udlis-a amaynu, mgaraden. Ad tafeḍ iqdimen, ilemmasen d yimaynuten. Uriɣ daɣen tullisin, werεad i tent-fkiɣ i wakken ad d-ffɣent».
Wa d abruy n yiwen seg yisefra-s, i d-tesres di tduli.
Rẓiɣ lemri n leḥzen
Ass-a lḥila tenfel
Ԑemdeɣ-as ɣer lkaɣeḍ ad d-temmir
Imru deg-i ad d-yessekfel
Imi iles-iw ur yezmir
Mačči akka i iga uḥemmel
A wid iɛecqen tteḍbiṛ
Rẓiɣ lemri n leḥzen
Ad ṛzeɣ yal tikti
Irekḍen lḥeqq n tmeṭṭut
Ay imru azzel fell-i
Yal awal am tefsut
Ɣiwel ɛjel tikli
Tura ad iyi-d-yeffeɣ ṣṣut.
M. K.