Iberreḥ-d yiwen wulɣu n tenmehla n yidles n lwilaya n Tizi Uzzu, s tukci n wazal n 20 721 n yidlisen i tnmehla tadigant n yidles. Nettat diɣ s timmad-s, tefreq-iten i twacult n yidles s umata, ama d tiddukkliwin, ama d timkerḍiyin, ama d tizeɣwa n tɣuri…atg. D idlisen s tutlayin yemgaraden, yerna n taɣulin d yiḥricen yemxallafen: Tasekla, tussna, agama…atg. Seg tazwara n useggas-agi n 2018, ar tura, yella-d ufraq n yidlisen-agi ɣef tlata n tikkal, anda i ttwaferqen wazal n 671 n yidlisen deg temhelt tamezwarut i d-yellan deg waggur amenza n useggas-a. Ma deg temhelt tis snat, i d-yellan deg kra wagguren ɣer deffir, ttwaferqen wazal n 5 050 n yidlisen-nniḍen ɣef umussu adduklan n lwilaya. Ma deg wussan-agi kan iɛeddan, tella-d temhelt tis kraḍert n ufraq, anda i ttunefken wazal n 15 000 n yidlisen ddima i twacult n yidles. Gar-asen 7 000 n yidlisen, yettwaferqen ass-nni n tɛacurt deg tesɣimt n tiddukla tadelsant Mbarek Ait Menguellet n taddart n Yiɣil Bammas, i d-yefkan acennay ameqqran Lounis Ait Menguellet, i iḥedren dɣa tasfugla-agi n ufraq n yidlisen. Ad d-nesmekti kan belli deg useggas iɛeddan, ttwaferqen wazal n 25 000 n yidlisen ɣef tuddsiwin n yidles yellan deg lwilaya n Tizi Uzzu.
Ghani Amazigh