Accueil Tamazight Aṭas n yigerdan i nɣant tkeryas

Bgayet : Aṭas n yigerdan i nɣant tkeryas

397
- PUBLICITÉ -

Mi ara iḍil yiwen ɣef yisallen i d-yewwi Unammas aɣelnaw n useḥbiber d tɣellist n ubrid (CNPSR), ad yeḥsu amek ilaq uɛiwed n leḥsab ɣef waddad n yigerdan i yeɣɣaren akked laman-nsen mi ara d-ffɣen i berra n uxxam-nsen. Imi dɣa, seg wayyur n cutember n useggas 2017 armi d yunyu yezrin, n useggas-a ideg nella, ugar n 391 n warrac, ddaw 14 n yiseggasen, i yemmuten ttwaddehmen deg yiberdan. Ɣef wawal n teɣbalut-a dima, tuget seg-sen d inelmaden, imi ttwaẓedmen deg ubrid i ten-yettawin ɣer uɣerbaz-nsen. D amḍan i yesqellqen ayendin imawlan, i d-yessuturen ugar n ulhaw d teḥrict-a tameẓyant n tmetti ama deg temdinin, ideg yella ahat ugar n umihi, neɣ deg temnaḍin timesdurar. Acku ula deg udrar, ttilint-d seg tikkelt ɣer tayeḍ twaɣiyin-a, am tin n wayyur n ɣuct yezrin i d-yeḍran di tɣiwant n Tsexriwt, anda yettwadhem yiwen n uqrur n kraḍ n yiseggasen. Akken i d-nnan kra n yimdanen i nesteqsa, tamasit (responsabilité) yal tikkelt anwa iɣef ara teɣli. Aya, imi tikwal d inehharen d tidet i iḍelmen, tikwal daɣen d imawlan, i yettserriḥen i tarwa-nsen weḥd-sen, neɣ war taɛessast. Ladɣa mi ara d-yesbeḥ d agrud n sḍis neɣ sa n yiseggasen, n useggas amezwaru neɣ n wis sin. D ayen i yeǧǧan dɣa buhan n yibabaten d tyemmatin, ulamma yewɛer lḥal, smenyifen ad ttseɛɛifen taḍfert-nsen, ad ten-id-ttarran nutni s axxam.

- PUBLICITÉ -

M. K.

- PUBLICITÉ -