Deg uḥric n tsuqqilt, yettnernin seg wass ɣer wayeḍ, tikkelt si taɛrabt tikkelt-nniḍen seg tefransist ɣer tmaziɣt. Dɣa deg wuusan-agi kan ineggura, i d-tella tsuqqilt n wungal « Pluies d’Or » n umaru-amsuɣel Mohamed Sari, ɣer tutlayt n tmaziɣt s uzwel « Igefran n wureɣ ». D mass Habib Allah Mansouri, amaswaḍ n tmaziɣt i yessuqlen adlis-agi, i yewwin arraz aseklan « Escale littéraire d’Alger » di 2016. Yessuffeɣ-it-id Mohamed Sari deg useggas n 2016 ɣer tezrigin Chihab, ma d tasuqqilt-is ɣer tmaziɣt teffeɣ-d s wafud d-iger Usqamu unnig n timmuzɣa (HCA) akk d tezrigin Chihab. « Igefran n wureɣ » neɣ s uzwel-is anaṣli « Pluies d’or », yettbeggin-d tiwtilin (ssebat) n tmuḥeqranit i d-tettidir tmetti tazzayrit deg yiseggasen-agi ineggura. Annect-agi, yella-d s tedyanin d teḥkayin yemxallafen si tallit ɣer tayeḍ, i d-yeglan s tegrawliwin daxel n tmetti. D « El Mahdi » i d awadem agejdan n wungal-agi, i yellan d ccix n lǧameɛ (limam) deg yiseggasen-nni n 1980, aṭas daɣen n teḥkayin ara naf daxel-s, yecban tin n « Cheikh M’barek » baba-s n «El Mahdi », tin Djilali Boulahbal…atg. Ɣer taggara, ad nesmekti belli, Mohamed Sari ilul deg useggas n 1958 di Cherchell, d aselmad (professeur) deg tesdawit n Lezzayer Tamaneɣt. D amaru-aneggal s snat n tutlayin (taɛrabt akked tefransist), d amsuɣel daɣen. Yura aṭas n wungalen gar-asen : « La tumeur » , « La carte magique » akked « La pluie » ɣer tama n yidlisen n tezɣent taseklant. Yettuneḥsab d yiwen tgejda timeqqranin n tsekla tazzayrit, yecban imura d yineggalen-agi : Assia Djebar, Yasmina Khadra, Mohamed Dib, Malika Mokaddem…atg.
A. A.