Ussan iɛeddan, yeḍra-d urway di tegnawt, ladɣa deg usamar n tmurt n Lezzayer. Yenna-d Useqqamu n yisallen n tegnawt d akken 60mm n waman i d-yeɣlin deg temnaḍin n Lezzayer. Ad d-nader : Ssuq Hres, ḥuzan-t iḥemmalen-agi s waṭas, imi leḥqen ɣer 59mm, syin ɣur-s tamnaḍt n Guelma. Ad tt-id-tetbeɛ Ǧiǧel s 35mm,Tizi Uzzu s 38mm, Tubiret s 27mm d waṭas n temnaḍin-nniḍen n usamar, anda Begayet, si lǧiha-is daɣen, tḥuza-tt twaɣit-agi, imi uzlen deg-s yiḥemmalen ladɣa di tɣiwant n Dergin. Iḥemmalen-a, seggran-d lemḍarrat meqqren, ama i cci-nsen (lmut n lmal-nsen d lexsara n leɣella), ama deg uhuddu n yixxamen seg yiɣezran i d-ifaḍen. Kra n yimezdaɣ n temnaḍin i tḥuza twaɣit-agi, beggnen-d asḥissef-nsen d lɣiḍ-nsen s lexsara yecban ta. Ma yella d wiyad, rran-tt i uɛummu. Sebba tameqqrant, ad tuɣal ɣer yiḍumman i iregglen ansi i ttɛeddin waman.
Y. S.