Akken yettwassen seg waṭas n tsuta-aya, segmi d-yennulfa deg leǧwahi n Yihendiyen d Waɛraben, ccatranj d yiwen n waddal n uqerruy i yelhan nezzeh, ama i umecṭuḥ, ama i umeqqran. Deg umaḍal merra, ayendin d tilɣuɣa akked tberziwin (tournois) n wurar-a i d-yettilin yal aseggas. Ussan-a kan i yekfa dɣa Olympiads n ccatranj, i d-yellan di tmurt n Jyurjya, ideg d tamurt n ccinwa i d-yufraren. Deg waɣir n Bgayet, mačči aṭas i yerran ddehn-nsen i usnerni n wurar-a, ama si tama n yinesdabuyen idiganen, neɣ seg tin n tddukkliwin d yimezdaɣ. Ulamma si 12 yimyuraren ifazzen di terbaɛt n Lezzayer, llan 9 si Bgayet, maca ur gerrzent ara ar tura tegnatin ideg yezmer uqrur, n wass-a ad yili azekka, gar wid yufraren deg umaḍal. « Di Bgayet ur nesɛi ara imuraren isadaren imi mazal d awanek i d-yettakken tadrimt i warmuden-nneɣ. Maca, nesɛa talɣuɣa n waɣir i d-yettilin yal aseggas, ideg llant 16 n trebbuyaɛ », i d-yenna uselway n temɣunt n Bgayet, Mass Karim Amɣar. Ugur n ukcam ɣer waddal-a yettwaḥemmlen, iban-d abeɛda deg usamar n Bgayet, imi ḥaca tarbaɛt n Uweqqas i izemren ad tili di lmendad, meskud ulac tirebbuyaɛ ama deg Ayt Smaɛel, deg Tsexriwt neɣ deg Yiderginen. « Lemmer ufiɣ, tili nesɛa deg Ayt Smaɛel tarbaɛt ideg nezmer ad nekcem, ma nebɣa ad nelmed urar neɣ ad nesnerni aswir-nneɣ deg-s. Tarbaɛt n Uweqqas, zemreɣ ad d-iniɣ tebɛed cwiṭ fell-aneɣ, meskud d inelmaden i nella, nseɛɛu ahil-nniḍen ad t-neg », i d-yenna yiwen n uqcic si temnaḍt. Ad d-nesmekti d akken llan di Bgayet ayendin d imuraren yelhan, imi llan yikerwaten igraɣlanen i qrib sawḍen akka tura 2 300 deg usismel amaḍalan elo.
M. K.