Tikkelt-a mačči d ungal, mačči d ammud n tmedyazt neɣ n tullisin i d-yernan d amaynut ɣer tsekla tamaziɣt, maca d tasɣunt Aselmad.
Segmi i d-tennulfa tikkelt tamezwarut deg yebrir 2017, tebda tettarew-d tiyaḍ armi i tessaweḍ ɣer tis rebɛa ussan-a kan. Tasɣunt Aselmad, tessemlal ddeqs n yimyura d yiselmaden i iḥemmlen ad d-sneṭqen imru s tutlayt n Mulud Mɛemmeri. Ha-tt-an ihi, teẓra tafat i tikkelt tis ukkuẓet. Akken i d-nenna deg yisebtar n Uɣmis n Yimaziɣen, ussan yezrin, tekfa s uqɛad sɣur sin n yimsuddsen i d-yelhan yis-s. Tulmist i aɣ-ijebden tikkelt-a, d tajmilt i yuɣalen sɣur ugraw n yimyura d yiselmaden i yiman n kraḍ n wudmawen i d-yeǧǧan ilem d ugerruj deg tira n tmaziɣt. Ɣas ma mgaraden di leɛmer, maca deg unaḍeh d timmuɣnest ulac aṭas n lxilaf. Tamezwarut d uletma-tneɣ Kaysa Xalifi i aɣ-yeǧǧan deg 25 yunyu yezrin. Tekki, yakan, s yiḍrisen-is deg kraḍet n tesɣunin n Aselmad i d-yeffɣen. Am wakken, daɣen, i tella d taneɣmast ifazen deg yisebtar n Uɣmis n Yimaziɣen. Tayeḍ d Dihya Lwiz i d-yufraren s wayen i d-teǧǧa gar wammud n yisefra d wungal ‘’Gar yigenni d tmurt’’. Udem-nniḍen d Ɛebḍella Ḥaman, ameɣnas ameqqran n tmaziɣt di Wehran, argaz n tsekla i aɣ-yeǧǧan si tama-s ussan-a kan yezrin. Ɣef waya i fernen yiɛeggalen n tesɣunt ad asen-tuɣal tejmilt xersum d asmekti i leqdic i d-ǧǧan. Tamawt-nniḍen i yewwin lwelha-nneɣ, d akken iḍrisen n tikkelt-a, uddsen u ttwawelhen srid ɣer uɣerbaz, acku aṭas deg-sen zemren ad ttwasqedcen deg temsirin n tmaziɣt imir-a. Ad naf iḍrisen imsegziyen, ussnanen, wid n uglam d uḍris imesfukel. Akken daɣen i llant tullisin yemgaraden di tewsit, zemren ad tent-afen yiselmaden d tasalelt di temsirin-nsen, ladɣa di tesnawiyin d uɣerbaz alemmas. Ad naf ula d timɛayin d tmucuha ilan (yesɛan) inumak lqayen. Nnig n 28 d udem i yuran deg tesɣunt n tikkelt-a. D asmekti kan i wid yebɣan ad rzun ɣer yisebtar-is, ad kecmen deg uzeṭṭa inmetti Facebook syin ad tekkin, ad arun isem n usebter : Tasɣunt Aselmad, dɣa ad asen-d-teffeɣ s tin n tura s tid yezrin.
Khaled. A