Accueil Tamazight Tiɣri n umsizwer i yiḥeddaden n wawal

AQBU - Timlilit tis 12 n tmedyazt n tmaziɣt n Ṣummam : Tiɣri n umsizwer i yiḥeddaden n wawal

745
- PUBLICITÉ -

D tiddukkla “Itri adelsan n Uqbu”, ara d-isuddsen timlilit tis mraw d snat (12) n tfaska taɣelnawt n tmedyazt tamaziɣt n Ṣummam, ara d-yilin seg 27 alamma d 30 deg duğember 2018.

- PUBLICITÉ -

I lmend n waya, tger-d tiɣri i wid yettfeṣilen awal i wakken ad jerden iman-nsen deg temsizzelt-agi n tmedyazt. Ad tili deg Uxxam n yilmeẓyen Abderreḥman Fares n temdint n Uqbu, deg lwilaya n Bgayet. Timlilit-agi, ad tt-gen d tajmilt i tmedyazt tameqrant Nadya Bennaɛmer. Ma d wid neɣ tid yebɣan ad ttekkin deg tfaska-agi-agi n tmedyazt deg tezrigt-is tis 12, ilaq fell-asen ad aznen 3 n yisefra-nsen, yettwarun s ttawil n uselkim, s tutlayt n tmaziɣt, yerna s usekkil alatini. Isefra-agi swayes ara ttekkin deg-s, ur ilaq ara ad ilin ttekkan yis-sen deg temsizzliyin-nniḍen n tmedyazt. Ass aneggaru ideg ara sersen isefra-nsen, wid yebɣan ad ttekkin, ad yili ass n 30 seg waggur n unbir 2018. Ad tili tuzna n yisefra ɣer tansa-agi taliktrunit: [email protected] , acu kan ur ilaq ad iseddu usizwer isem-is neɣ uṭṭun n usiwel-is deg yisefra-agi ara yazen. Ma i wugar n yisalan ssiwlet ɣer wuṭṭun-agi: 034 33 45 78 neɣ 0775 54 57 76. D tiɣri i yiḥeddaden n wawal, ama d amedyaz ama d tamedyazt, neɣ d win yettewzanen awal deg usefru-s, yessefk kan ad yili yiles-is d amaziɣ daya. D timsizzelt ara yesqerdcen tamedyazt tamaziɣt s tantaliwin-is yemgaraden: taqbaylit, tacenwit, tamahaqt…atg. Annect-agi imi d tafaska taɣelnawt n tmedyazt tamaziɣt, i d-yesddukklen imedyazen imaziɣen s umata. Yetturaǧu ad yili wahil n tfaska-agi d anesbaɣur: Gar isaragen ɣef tmedyazt, timsikniyin yemxalafen, asenzi n yidlisen s yibuddan, ladɣa, wid n tmedyazt. Rnu ɣer temsizzelt-agi n tmedyazt, ad tili diɣ tmenna n yisefra berra n temsizzelt…atg. D ttiɛad adelsan yuɣen aẓar deg lwilaya n Bgayet, yefka afud i tmedyazt tamaziɣt, imi yettuneḥsab d aɣerbaz n tmedyazt, acḥal d amedyaz i d-yeffɣen syin. Asiher-agi, ara yeddun ɣef teɣzi n rebɛa wussan, ad yebdu s wudem unṣib ass n 27 duǧember 2018 s tulya tunṣibt d temlilit d yimedyazen. Ma d ass aneggaru n temlilit-agi, ad yili ass n 30 deg duğember 2018, anda ara d-tili tukci n yigerdasen n usebɣes i wid yettekkin deg temlilit-agi tis mraw d sin, am wakken daɣen ara fken arrazen i wid ara d-yufraren. Ad d-nesmekti kan belli tiddukkla-agi “Itri adelsan n Uqbu”, tebda leqdicat-is s wudem unsib ass n 2 deg meɣres 1976. Ma d tafaska-agi, tebda deg useggas n 2005, yal aseggas yettili-d deg-s umaynut.

Kraḍ n warrazen i temsizzelt-agi tis 12

Tazrigt-agi tis 12 n temsizzelt n tmedyazt tamaziɣt n Ṣummam, ad tefk 4 n warrazen i setta n yimedyazen ara d-yufraren deg snat n tewsatin n temedyazt: Tamensayt (taqburt) akked tmirant (tamaynut). Acu kan d arrazen imzumal (symbolique) kan imi iswi n temlilit-agi mačči d arraz, d asnerni n tmedyazt taqbaylit, ɣef leḥsab n yiεeggalen n tddukkla-a tadelsant. Di tmedyazt tamirant, ad ilin sin warrazen i tlata n yimedyazen imenza ara d-yifriren: Bab n umḍiq amenzu, ad as-d-suffɣen ammud n tmedyazt weḥd-s. Ma d bab n umḍiq wis sin d wis tlata, ad asen-d-suffɣen yiwen wammud ara d-ijemlen isefra n sin-agi imedyazen. Ma di tmedyazt tamensayt, ad yili yiwen kan warraz, ara yilin d ammud n tmedyazt i tlata n yimedyazen ara d-yifriren deg umyezwar deg ṣṣenf-agi n tmedyazt. D adlis, ara d-ijemlen isefra n umedyaz ara yawin amḍiq amezwaru d win n umḍiq wis sin akked bab n umkan wis tlata. Annect-agi, yuɣal ɣer lexṣaṣ n tedrimt n tddukkla-agi, ɣef wakken i t-id-nnan yiɛeggalen-is.

Gh. A.

- PUBLICITÉ -