Tettwawexxer tbeddi n uqeyyem n wayla n ucennay ameṛḥum Matoub Lounes, d tin ay ssefran naqal ass n larebɛa deg texxamt n tnefrut n Tizi Uzzu, yernu ad d-tili ass n 7 umbir, ɣef wakken ay aɣ-d-xebbren din. Ssebba n uwexxer-a d aɣabi n yemma-s n “Uɣewwaɣ”, imi ah-tt-an d tamuḍint deg usegnaf, ɣef wakken ay d-tenna Tesbeddit n Matoub Lounes yernu twekked-it-id daɣ tmeṭṭut n umeṛḥum, Nadia Matoub-Barhimi, ay yessutren asemmi n umazzay ara iqeyymen ayla n Matoub Lounes i yettwanɣabn ass n 25 Yunyu 1998. Malika Matoub, weltma-s n Lounes, teḥdeṛ din yernu tenna-d belli nettat d yemma-s, s yisem-nsent d tiwṛitin tinegtiyin n 77% seg wayen ay d-yeǧǧa unaẓur-a, fkant amur-nsent i Tesbeddit n Matoub ay d-yelhan s uḥraz n tkatut n Uɣewwaɣ. Twekked-d Malika Matoub belli aqeyyem-a ad d-iḥaz akk ayla n unaẓur-a ay iwten ɣef timmuzɣa d tugdut, yernu tettekka deg waya tkerrust-nni aydeg yella mi t-nɣan, allalen-nnes n uẓawan…atg.
