Amraḥ n yimrigen di Wehran, neɣ Place d’arme akken i yettwassen, ɣas ma, tura, yuɣal semman-as amraḥ n umenzu n unbir, maca smenyifen yimdanen isem-nni n zik. D adeg i d-ǧǧan Yirumyen, yufrar di ccbaḥa, yerna-d tahuski i temdint n Wehran s usebdad i yellan di tlemmast. Win ara yerzun ɣer Wehran, adeg amezwaru ara yebɣu ad iwali, ma mačči d Lqelɛa n Santa Kruz, ɣas ini d Amraḥ n yimrigen. Deg wussan iɛeddan, yella-d usewseɛ-ines, ad d-rnun tama n wadda akken ara yiwsiɛ, ad yicbiḥ ula di tmuɣli, maca ixeddim deg-s ur yeddi akken ad ifak di lawan. Ɣef waya i d-txebber tɣiwant n Wehran d akken ad d-yili usunẓu-ines ass n 1 n unbir i d-iteddun I lmend n usmekti n uterḍeq n waɛbar n tegrawla n Lezzayer. Mbeɛd mi yebda leqdic deg-s acḥal-aya, niqal ad d-yili usunẓu deg 5 yulyu yezrin, maca yella-d uɛeṭṭel, ihi ǧǧan-t i umenzu n unbir mi ara yekfu deg-s umahil. Tikkelt-a, ad d-tuɣal tcebbeḥ tamnaḍt-nni s umata, ladɣa imi di tlemmast n temdint i d-yezga, ad d-tefk udem d amaynut. Ad tili d tibḥirt yeldin tiwwura-s kra yekka wass i yimsebriden. Am wakken daɣ ad tili d annar u d adeg n wurar i warrac imeẓyanen. Twekked-d tɣiwant d akken yettili-d uḍfar n leqdic n uṣenfar-a qrib yal ass. Ula d lwali, iger-it gar yiṣenfaren i ilaqen ad kfun di lawan-nsen, ma nmuqel azal yesɛa wadeg-a i d-yernan tahuski i tlemmast n temdint n Wehran, u ma neẓra daɣen belli Wehran ad d-tesuddes uraren n yilel agrakal deg unebdu n 2021.
Khaled. A