Tella-d temlilit i d-ijemɛen iselmaden n tmaziɣt n umalu n tmurt (aɣir n Wehran) akked umaswaḍ i d-yellan i lmendad-nsen, Mass Abdellah Arkoub. Leqdic-a iɣef yerza umaswaḍ, yekcem deg usenṣeb n kraḍ n yiselmaden (sin n uɣerbaz amenzu, yiwen n uɣerbaz alemmas). Ifures tagnit Mass Arkoub I wakken ad yessuter seg uɣella n usileɣ deg tenmehla n usedwel akken ad d-ssudsen timlilit n usileɣ ara t-id-yesgerwen d yiselmaden-a i yiwen n wass. D ayen i d-yellan ass n arim, 15 deg tuber 2018, seg 9 n ssbeḥ armi d 16 n tmeddit. Ula d iselmaden, fursen tagnit deg-s, bedren-d akk uguren i d-ttemlilin deg unnar segmi bdan, acku aselmed n tmaziɣt i yiɛerbawalen mačči am uselmed-ines deg tmurt n leqbayel. Rnan-d fkan-d u sumren-d tarrayin i sseqdacen di tneɣrit d wamek sselḥuyen timsirin-nsen akked yinelmaden. D isteqsiyen iɣef i d-yerra umaswaḍ-nsen s yiwellihen i asen-d-yefka ɣef teɣzi n wass, d wamek i ilaq ad mɛamalen s lekyasa akked leḥdaqa d yinelmaden neɣ d yimawlan-nsen akken ara asen-sḥemmlen tamaziɣt, ladɣa imi taɣult-a d tamaynut di temnaḍin-agi. Akken daɣen i d-yella umeslay ɣef ugbur i ilaqen ad yili deg uṣenfar deg tesmilin yecban tigi, imi i asen-yefka iṣenfaren ara ḍefren ladɣa i uswir amenzu n tmaziɣt (aseggas wis ukkuẓ). D ass igerrzen i ssezrin yiselmaden-a s lferḥ, aṭas i d-ugmen, rnu ula d imḍebbren n wammas-nni ideg d-tella temlilit, umren u snesfen akken iwata yis-sen. Ad d-nesmeki kan belli aselmed n tmaziɣt di Wehran, yebda deg useggas n 2015 s yiwen n uselmad kan, imir-a yewweḍ umḍan ɣer 9 n yiselmaden. D Mass Arkoub Abdellah akken i d-nezwar deg-s i d amaswaḍ yellan i lmendad-nsen, s zzyada ɣef wasunen yeṭṭef di Tizi Uzzu, nenna-d yerna yeṭṭef iselmaden n Wehran, yerna wid n Sidi Belɛebbas d wid n Tala Yemsan.
Khaled. A.