I lmend n usmekti s wass aɣelnaw n tɣamsa, i d-yettilin ass n 22 tuber n yal aseggas, tesuddes-d tddukkla n yineɣmasen d yimazzanen n lwilaya n Tizi Uzzu (AJCTO) d tenmehla n yidles ahil d anesbaɣur.
Dɣa deg tsebḥit n wass-nni n letnayen, yella-d usersi n snat n tmeqqunin n yijeǧǧigen ɣef usebdad n tlelli n tɣamsa, yellan deg tlemmast n temdint n Tizi Uzzu. Syin akin, tella-d tɣuri n lfatiḥa akked ibeddi n ddqiqa n tsussmi ɣef lerwaḥ n yineɣmasen imeɣrasen, i iseblen iman-sen d asfel i lmend n uxeddim-nsen. Ifures daɣa, tagnit umaray amatu n lwilaya n Tizi Uzzu, Mass Azeddine Tibourtine, yerra tajmilt meqqren i yineɣmasen yenɣa rrebrab deg tɛecret-nni taberkant. Yenna-d: “D lwaǧeb fell-aɣ ad asen-nerr tajmilt i yimeɣmasen-agi yettwaḥsaben d imeɣrasen. Gar-asen: Smaïl Yefsah, Tahar Djaout, Saïd Tazrout, Aït Mebarek d Saïd Mekbel…atg”. Am wakken daɣen i isenmmer ineɣmasen i mazal qeddcen deg unnar-agi iweɛren n tɣamsa, yenna-d : “Taɣamsa, d ttawil n izeṭṭen assaɣen di timetti” . Ma si tama-s, ugensas (représentant) n uselway n Useqqamu aɣerfan n liwlaya (APW) n Tizi Uzzu Mass Mesbahi, i iṛeggmen awenneɛ n tegnatin n uxeddim n yineɣmasen d useǧhed n ttawilat ilaqen i useddu n umahil-agi n tɣamsa di lwilaya n Tizi Uzzu. Syin akkin tamegla (la délégation), terza ɣer Uxxam n tɣamsa Malik Aït Aoudia n lwilaya n Tizi Uzzu, anda i d-yuɣal umaray amatu n lwilaya ɣef tegnatin d lexsas ideg xeddmen yineɣmasen yettilin dinna. Mbeɛd mi yesla tabrat i d-yeɣra uselway n tddukkla (AJCTO) ideg i d-yebder merra iɣeblan yettidir uḥric n tɣamsa deg lwilaya-a, yenna-d Mass Tibourtine: “Deg wussan i d-iteddun, ad d-lhun merra s wuguren i d-ttmaggaren yineɣmasen yal ass, yerna s tɣawalt”. Ma deg tmeddit n wass, ikemmel wahil n usemekti-agi s tesfugla n usmekti n sin yineɣmasen i d aɣ-yeǧǧan aseggas-agi. Rran tajmilt i Abderrahmane Bettache iwumi ssawalen “Youcef”, i yemmuten ass n 28 cutember iɛeddan, i yuɣ lḥal ixeddem ɣer uɣmis n “Le soir d’Algérie”. Rran tayeḍ diɣ i uneɣmas d umkaḍuf deg rradyu tis 3, yemmuten ass n 28 ɣuct yezrin. Llant-d tnagiyin fell-asen ama si tama n twaculin-nsen ama si tama n yimeddukkal-nsen ineɣmasen. Am wakken daɣen i rran tajmilt-nniḍen i uneɣmas n (APS) Makhlouf Illoul, yefɣen ɣer tesɣimt deg wussan iɛeddan. Ɣer taggara n leqdic-agi, tella-d yiwet n tigda timedwart (table ronde), i d-yewwin awal ɣef wazal n uneɣmas deg usemsawi n uzeṭṭa d tezḍawt n tmetti.
A. A.