Ass-nni n letnayen 22-10-2018 tameddit n wass, i yettwafraq warraz n uselway n tegduda i uneɣmas asaduran deg tezigt-is tis rebɛa, i lmend n usmekti s wass aɣelnaw n uneɣmas. Tadwilt tis 4 n warraz uselway n Tegduda n uneɣmas asaduran, i d-yettwasuddsen ddaw usentel « Tudert yezdin di talwit », yella-d ufraq-ines deg Lezzayer tamaneɣt. Mraw d sin (12) n yineɣmasen iqeddcen deg taggayin yemgaraden n tɣamsa. Azal n 286 n yimsizzewren i ittekkan deg temsizzelt-agi taɣelnawt, maca ala 12 deg-sen i d-yufraren. Arraz amezwaru n taggayt n tiliẓri, yettunefk i tneɣmast n Naima Manhour, ma d arraz wis sin tewwi-t Kahina Acherchour, ma d wis tlata yuɣal i tneɣmast Souhila Hrayria i ixeddem i tlata yidsent ɣer yiwet n tiliẓri tuzzigt. Arraz amenzu n taggayt n tɣamsa yuran, iṣṣaḥ-d taneɣmast Nour El Houda Taibi n uɣmis “Ennasr”, ma d wis sin iḥella-t-id uneɣmas Cherif Abdedaim n uɣmis “La Nouvelle République”, ma d arraz wis tlata d ucrik gar snat-agi n tneɣmasin: Lydia Ait Akli akked Aiza Mahdid. Ma deg wayen yerzan, taggayt n tɣamsa n rradyu, d Nawel Arar i d-yufraren s warraz amenzu, i xeddmen deg rradyu tamezwarut, arraz wis sin yuɣal i uneɣmas n rradyu El Bahdja Kamel Mhidi, ma arraz wis kraḍ yewwi-t uneɣmas Salem Kheloui n rradyu n Tizi Uzzu. Ma deg wayen yeɛnan arrazen n tɣamsa taliktrunit, ala arraz wis sin i yettwaferqen i Lounès Guermoul, ma d arraz amenzu d wis tlata ur ttwaferqen ara. Arraz n tugna igerzen, yettunefk i uwellaf Ilyes Hebache El Watan, ma d arraz n teseqqamut n ufran yettunefk i Baami Mohamed n rradyu n Tamanarasset. Am wakken daɣen i ttwaferqent 14 n cciɛat n wakaz (reconnaissance) d yiseɣ i 14 n yineɣmasen yettwassnen deg taggayin yemgaraden n tɣamsa. D aneɣlaf n teywalt Mass Djamel Kaouane, i yellan d aselway n tesfugla-agi, ɣer tama n ddeqs n yimḍebbren imeqqranen n tmurt. Yenna: “Tamurt n Lezzayer, tesseǧhed agni uɣdiman iwatan akked usishel i uneɣmas ad yexdem tawuri-ines n uselɣu akken iwata. S wawal-nniḍen, ad yili wugar n ugerrez n tegnatin ideg xeddmen yineɣmasen izzayriyen sya ɣer sdat”.
Adaoun Abdelghani