Aḥric 1u
Yiwen wass, usant-d ɣer teɣremt snat tlawin ɣer umɣar azemni, yiwet d timizwiɣt tayeḍ d timibrikt. Yal yiwet deg-sent teddem-d agrud deg ufus-is. Igerdan-nni ttemcabin aṭas, maca yiwen deg-sen d amuddir wayeḍ yemmut. Sersent snat tlawin-nni igurden-nsent sdat n uɛric n umɣar, qqumcent, bdant la d-ḥekkunt ayen tent-id-yewwin ɣer dinna. Amɣar azemni, yesmuzgut-asent s uhannay ameqqran : – Ay Unnig-nsen, i d-tebda tmeṭṭut timizwiɣt, nekk ttidireɣ di yiwen n uxxam akked tmeṭṭut-a, nettat d takna-inu. Azal n wayyur aya, s kra n wussan kan gar-anteɣ, i snat yid-nteɣ nurew-d sin yigerdan yellan s tezmert igerrzen. Armi d iḍelli tameddit, agrud n tmeṭṭut-a yebda yettiẓẓif. Netta ad yili yemmut kra n tsaɛtin deffir mi nessexsi tafat akken ad neṭṭes. Ur ifaq yiwen s wayen yeḍran i ugrud-a siwa yemma-s. Dɣa imi nekk tuɣ-iyi ɣebbseɣ deg yiḍes alqayan, tfures tagnit tekker-d di talest, teddem-d agrud-iw terr win-ines deg umkan-is. Mi d-ukiɣ taṣebḥit-a, faqeɣ agrud yellan ɣer yidis-iw ur yesnuffus ara. Mi ḥekkreɣ nezzeh deg-s, ukzeɣ netta mačči d wa-inu. Imir-nni kan, tenṭeq-d tmeṭṭut timibrikt tini umɣar azemni s yimeṭṭawen deg wallen : ‘’Uhu, ay Unnig-nsen ! Tameṭṭut-a la teskiddib. Agrud amuddir d ayla-w”. Din-din, tegzem-as awaltmeṭṭut timizwiɣt twekked-as i umɣar azemni belli d amuddir i d agrud-is. Sakin la itteddu ad yekker umerẓi imawi gar snat tlawin-nni. Imiren dɣa, yenṭeq-d ugellid ɣur-sent : Dayen ! Dayen ! …tettkemmil
Seg tsekla taqbaylit