Seg 01 armi d 03 deg wayyur n unbir-a, ad yettwasuddes deg Ayt Smaɛel yiwen n uneḍruy agraɣlan s wazal-is, i d-yessegrawayen ilemẓiyen deg tegnit n ulmad deg waṭas n taɣulin, akked umbaddel n tektiwin ɣef yisental imaynuten n tudert n termist neɣ ɣef waddad d yiɣilifen i d-yettilin di tmetti s umata. Yettusemma warmud-a s teglizit « Techstars Startup weekend ». Ɣef wayen i d-yeddan di tiɣri i tikkin, ad ilin abeɛda aṭas n yiḥuna (ateliers) ara d-gen yiselmaden deg temkarḍit n tɣiwant n Ayt Smaɛel s teɣzi n wugar n 50 n yisaragen ara idum usihar-a. Imi iswi agejdan d awwaḍ ɣer ukcam neɣ aseqleɛ n walbaɛḍ n yisenfaren ara yeffɣen ɣef tudert tasadart n yilemẓi d tlemẓit. Ɣef wawal n Tiziri Idir, yiwet seg tɛeggalin n tddukkla Amzur ara ibedden i wahil, ad yili waya d tagnit igerrzen i waṭas n tlawin d yilemẓiyen n Ayt Smaɛel ma bɣan ad d-lemden ayendin d tilufa, ad d-snulfun tarmist-nsen.« Ttiɛad-a ɣur-i d yiwet seg tarrayin iwennɛen akken ad fehmen medden, tugart imezdaɣ n Ayt Smaɛel, d acu i d azal n uxeddim s twizi. Nesɛa aṭas n tlawin i iqeddcen deg yal taɣult, maca ur ssinent ara amek ara selḥunt ayen i d-xeddment. Lemmer ad grent deg tinna n umɛiwen d twizi, aṭas ara afent d abaɣur. Yesselmad daɣen usihar-a n Startup d akken mačči s umelyar i tbeddu termist, maca s drus n tedrimt, tzemreḍ ad tesmurrseḍ ma tkecmeḍ di ssuq n ṭṭjara timegzit d twizi », i d-tenna. Ad d-nesmekti ɣer taggara d akken yekfa dayen ujerred i ttiɛad-a, i d-yellan deg Internet. Akka tura, ugar n yinebgawen n yiseɣ, yetturaǧu ad ilin azal n 100 n yimekkiyin ara yeɣren ɣef teɣzi n waṭas n yisaragen, ara d-yerzun daɣen seg waṭas n twilayin.
M. K.