Aṭas n yiqeddicen i tetteɛraḍ ad teg tddukkla Agraw n tɣiwant n Ccmini. I lmend dɣa n wahil i d-tessudus i wussan n 16 d 17 deg unbir, newwi-d awal akked yiwen seg yiɛeggalen-is, Mass Nadir Uddak.
Aɣmis n Yimaziɣen:Tɛeggnem-d i wussan i d-iteddun s rreḥba n temsikniyin n udlis. Mmeslay-aneɣ fell-as…
Nadir Uddak: Ih, d rreḥba n temsikkniyin n udlis, ideg ara yilin isaragen, inejmuɛen i ṭṭabla akked tnezzuyin n ubuddu n kra n yimura. Taẓrigt tamezwarut, ad tt-neg akka i ufsar. Maca nessaram ɣer sdat ad nessemɣer asihar alamma yuɣal d tafaska. Ihi, kra n win yebɣan ad yeḥḍer, ansuf yis-s. Ad aɣ-d-yessiwel kan, ad t-njerred si tura.
Amek i d-tusa tekti i uheggi n ttiɛad ?
Ahat ugar n sin n yiseggasen, nekni nettxemmim-as deg tddukkla-nneɣ. Maca ur nufi ara tallelt mi nella nebɣa srid ad tili d tafaska n udlis, armi nuɣal ɣer tekti n temsikent di teẓrigt-a tamenzut akken i d-yella wamek ad neg armud.
Ugar n temsikniyin n udlis, nwala ad yili wayen-nniḍen…
Akka. Ur terzi ara temlilit at udlis kan, imi ttwaldint tewwura ula i yinaẓuren, i wat lḥerfat d yikerrazen. Meḥsub win neɣ tin yesɛan tiqendyar tiqbayliyin, ibernusen, iqennucen, tamemt n udrar, zemren ad ten-id-awin ad, ten-senzen di rreḥba-a.
Amek iga umezruy n tddukkla-nwen Agraw di kra n wawalen ?
Tennulfa-d tddukkla Agraw deg useggas n 1998. Seg yimir-nni ur teḥbis, ulamma tikwal, yeṭṭuqqut, tikwal yettenqas uqeddic. Nesker-d abeɛda deg teɣzi n umecwar yiwet n talilt n tlawin tfaz ayendin, nxeddem amezgun, nettarra tijmilin i yimdanen n yidles, nesfuggul tifaskiwin timaziɣen, d waṭas n tlufa-nniḍen.
Yella kra ad t-id-ternuḍ taggara…
Nella nebɣa ad nerr tajmilt i tmarut Kaysa Xalifi deg rreḥba-a n udlis, maca nemsefham s yiɛeggalen n tddukkla, ad tt-nwexxer i wass-nniḍen s wahil d uzzig.
Yesteqsa-t M. K.