Ɛebḍella Ḥaman, d udem gar wudmawen i d-ineǧren abrid n ṣṣwab, win n tidet deg temnaḍt timseɛrebt di tmurt n Lezzayer tamaziɣt. Izux s tmaziɣt, yuzzel fell-as, inuda, yura yis-s. D ameɣnas, icuba ɣer yimeɣnasen icuban irden, ɣas ma nmeṭṭel tifekkiwin, ttemɣayent tektiwin. I lmend n usmekti n 40 n wussan segmi i aɣ-yeǧǧa ubabat n tsekla n tmaziɣt di Wehran Abḍella Ḥaman, tuɣal-as tejmilt ɣef teɣzi n sin n wussan s uneḥḍur n twacult-is, imeddukkal-is d wid akk i t-iḥemmlen. Ass n sem ssbeḥ i d-tella tirza ɣer tqerrabt n Ɛin El Bayḍa anida yeṭṭes i lebda. Sersen ijeǧǧigen ɣef uẓekka-ines, ɣran lfatiḥa u wwin-d fell-as awal. Ma d tameddit n wass, tella-d temlilit deg Uxxam n tddukkla Numidya anida i d-mmlalen yiɛeggalen, rran-as tajmilt: llan wid i d-yeɣran isefra d yiḍrisen i yiman n Dda Ɛebḍella ameɣras amyaru; llan daɣ wid i d-yemmeslayen ɣef Dda Ɛebḍella, amdan s talsanit talqayant yekseb deg wul-is. Ass n ssebt ɣef 16h00 n tmeddit deg uxxam n tddukkla Imeɣri Amecṭuḥ (Le Petit Lecteur), tuɣal-as tejmilt-nniḍen, tikkelt-a d tin i d-yessuddes Mesɛud Babaǧi, d ameddakel-is, d arfiq-is aṭas n yiseggasen. Niqal ad yili umyaru, aneɣmas Amin Zawi deg usiher, maca di ddqiqa taneggarut yeɣli-as-d ccɣel iɛejlen dɣa iɣab. Acu kan teḥḍer twacult n Dda Ɛebḍella d yimeddukkal-s. Tella-d tejmilt amzun d asarag ɣef umecwar i d-yewwi di tudert-is merra, segmi yeffeɣ d amusebbel di tegrawla armi d ussan-is ineggura deg tudert. Syin, fkan-d akk tamuɣli-nsen wid iḥeḍren, ama d wid i t-yessnen s lqerb neɣ s lbeɛd. Tikti iɣef mtawan, ilaq yal mi ara tettunefk tegnit, ad as-tuɣal tejmilt, acku d tigejdit gar tid i d-yeǧǧan ama i tira n tmaziɣt, ama d amedya i tsutwin i d-yettenkaren akken ad ddun deg ubrid-is, d abrid n tissas d timmuzɣa.
Khaled. A