Deg wass yecben ass n umhad yezrin, 1 unbir deg useggas n 1954, yekker-d ugdud azayri i wakken ad yekkes ddel d ttεebya ẓzayen yellan ɣef tuyat-is. Imi win yesruḥen tilelli-s ur d-yegri d amuddir. D ayen i yeǧǧan wid yesεan tirrugza d leḥmala n tmurt, gan-d ass-n d ass n tezwara n tegrawla mgal acengu aṛumi. Tamurt n leqbayel, turar nnuba-s deg waya, yerna s ufmiḍi ameqqran. Idurar, cehden ɣef lgerra n 54, am yirgazen am tulawin, kkren refden leslaḥ, acku ur qbilen s tudert n uknay d ddel. Tadayra n Xeṛṛata akken i neḥsa akkit, tettekka aṭas di tegrawla, win ad d-yaddren Xeṛṛaṭa, ilaq ad d-yesseddu axeṣṣaṛ n 8 di mayu 1945 i yeḍran di Xeṛṛaṭa, Galma, Sṭif akked Melbu. Imezdaɣ n Tdayra-a, fkan-as azal d ageεmir i wass n 1 unbir. Ataṣ n yiqeddicen i d-yellan, gar-asen timsizzelt n waddal i d-heggan yemḍebbren n Uqusis anaddal ( club sportif ) n Xeṛṛata i ubaɣuṛ n warrac imecṭah, ticeqqufin n umezgun, asεeddi n usaru n Krim Belqasem di tzeqqa n 8 mayu 1945, d ḥawla n lecɣal-nniḍen. Fkan akud d tezmert-nsen i wakken ad yesmurres leqdic-nsen. Ma yella s tnaga n yiwen n yilemẓi ulac d acu xedmen, dɣa yenna-aɣ-d:« Xas ma yella neεreḍ ad nexdem ayen iwumi nezmer, ladɣa i wakken ad d-nessissen amezruy i warrac imectaḥ, meεna d awezɣi ad nessiweḍ ad asen-nerr tajmilt i wid yefkan tudert-nsen d tasfelt i wakken ad nidir di talwit ass-a ». Ad nekfu ameslay s yiwen n wawal i d-yeqqaren ‘’tilleli tettwaway ur tettwafkay’’. Iziɣer-nwen di talwit a wid ur nemmut.
K. K.