Seg ssrabes n tujjya ideg i d-yettemlil umezdaɣ n Ayt Smaɛel aṭas n wuguren akken ad d-yeqḍu ccɣel-is, yella win yerzan taɣult n udawi n tuɣmas. Ama deg sbiṭar amecṭuḥ n Tizwal neɣ ɣur umsujji uslig. Ɣas mgaraden cwiṭ wuguren, maca sebba tagejdant, ɣef wawal n waṭas n yiɣermanen, d tin icudden ɣer tuqin n yimsujjiyen i yettxessen deg waṭṭanen n tuɣmas. Deg tzeqqa n Tizwal, seg wakken ḥaca yiwen n umsujji n tuɣmas i iqeddcen deg-s, yezga yeččaray wumuɣ n uraǧu armi d-ttɣiman wid iwumi ur d-tettsiḥ nnuba. Tikwal, yettekkar umennuɣ gar medden i d-irezzun d yiqeddacen neɣ d yimsujjiyen i yettabaɛen tazeqqa-nni. « Neɛya dayen deg yir liḥala n tzeqqa n Tizwal. Amek ṭṭebbat xussen maḍi deg-s, aduz (lanistizi) dima ifukk, nutni rzan sexdamen tudemt ɣef yimuḍan. Ilaq ɣef wid terza taluft, ad aɣ-frun aɣbel-a s zzirban », i d-tenna yiwet n tmeṭṭut seg Ayt Smaɛel. Ugar n waya, ula d imsujjiyen i ileddin tizeɣwa i yiman-nsen, ur ṭṭuqten ara deg tɣiwant n Ayt Smaɛel imi ḥaca yiwen i inuḥen seg wacḥal d aseggas tura. Yeǧǧa waya lɣaci teṭṭfen-d s tuɛert nnuba, abeɛda i ubeddel n uɣesmar neɣ i uselden (uplumbi) n tuɣmas-nsen. D ayen sɛeddayen dɣa tuget n yinelmaden i iɣesben deg udawi n walbaɛḍ n waṭṭanen n tuɣmas-nsen. « Ala deg yimuras i yeshel ɣef yiwen ad idawi tuɣmas, acku ɣas ad yettḥettem ad yerǧu ussan, ahil-is d ilem d ilem. Maca di teswiɛt-a, ilaq ad tbeṭṭleḍ axeddim berdayen i tuṭṭfa n nnuba d uqḍaw n ccɣel-nni », i d-yenna yiwen n ubabat. Si tama-nniḍen, yewwi-d ad d-nemmeslay ɣef teɣlayt n sswami ɣur umsujji uslig n tuɣmas ur d-nettsubbu seg 800 n yidinaren i uqlaɛ kan, wamma ayen-nniḍen s wugar maḍi.
M. K.