Asawal neɣ aglaway, d allal i d-turew tussna d unadi ussnan s tallalt n wallaɣ n umdan . Nezmer ad d-nini d akken allal-a seg wasmi i d-yennulfa i tikkelt tamezwarut deg useggas n 1876 ɣef ufus n ʺAlexander Grahame Billʺ, iɛedda-d ɣef waṭas n tikliwin i wakken ad d-yaweḍ s wudem i yella ass-a, imi deg tazwara yettili anagar deg yixxamen s tmentilt n temɣer d taẓayt-is. Maca deg tallit-a tamirant, yuɣal mezzi almi i t-nettawi yid-neɣ anda nedda, yerna yesɛa aṭas n yisnasen i yessishilen tudert-nneɣ. Aglaway , d yiwen n wallal i yesɛan azal meqqren deg tudert n umdan, imi ɣur-s aṭas n yibaɣuren. Maca, ila daɣen ayen n diri i yettḍurrun amdan. Deg tazwara, asawal,yelha i tudert n umdan imi d allal n usiweḍ n yizen akked ferru n yiɣeblan deg wakud wezzilen. Am wakken daɣen, d allal n usiwel i yimeddukkal d twacult. Mebla ma nettu d akken asawal, yesɛa azal deg uḥric n ulmad imi nezmer ad naf deg-s idlisen i tɣuri ayen ara yesnernin allaɣ. Nesseqdac-it, diɣ, i usmuzget n tezlatin yelhan, i aɣ-yessettuyen iɣeblan i nettidir yal ass. Mebla ma nettu tugniwin i nxeddem yis-s, tid i aɣ-d-yesmektayen s wakud yelhan i nesɛedda deg tudert-nneɣ. Aya seg tama. Ma seg tama-nniḍen, nezmer ad d-nini d akken aglaway diri-t i tdawsa n umdan, acku yesseḍεaf asekkud u yesnulfay-d yiwen n waṭṭan i iweɛren i tujjya : Amdan yettḥemmil tiɣimit i yiman-is. D annect-a i as-d-yettawin iɣeblan ama ɣer twacult-is neɣ ɣer yimdanen-nniḍen .Tin ɣer-s, ma yella umdan ur yessin ara ad t-yessqdec deg wayen yelhan, yesruḥuy akud-is war ma yerra-d s lexbar, zyada ɣer lexsara n yidrimen-is s waṭas. Γer taggara , ad d-nini d akken aglaway yelha i tmeddurt-nneɣ imi aṭas n yibaɣuren i yesεa, maca yessefk fell –aɣ, ad t-nesseqdec s tuget n leɛqel akken iwata .
Feriel Guellaz