Tuɣal-d ussan-a kan tigawt n ucetki d tagant n tfidiralit n yixeddamen n tɣiwanin. Deg waɣir n Bgayet, aṭas seg-sent i d-yerran i tiɣri n tfidiralit-nsen mi ten-teɛreḍ i uneḥbus ɣef uxeddim kraḍ n wussan n wayyur n 22, 23 d 24 di ṭuber yezrin.Ɣef leḥsab n teɣbalut-a, ur bɣin yigensasen (représentants) n yixeddamen n twuri tazayezt mi ur d-rrin wid teɛna taluft i wayen ssuturen ar ass-a n wussan. Yewwi-d ad d-nerr awellih d akken seld aya, akken i d-tewwi tɣamsa, zemren ad gren yinawuren-a deg lficṭa yeldin ma mazal yugi uɣlif ad asen-yefk ayen ssuturen, neɣ xersum ad asen-yeldi tawwurt i temlilit d umciwer. Acku si tama-a yennuɣnan wat tfidiralit, imi bɣan kan ad d-yettili si tikkelt ɣer tayeḍ umciwer ɣef tɣerɣert n tsutriwin s i d-berrḥen buhan-aya tura. Seg waya, Ilaq ad d-nini daɣen belli mačči d ayen yelhan akk wayen i d-wwint taganin deg yakk tiɣiwanin yettwaḥuzan, imi d aɣerman i yenṭerren d amezwaru akken yebɣu yili. Amedya n Ayt Smaɛel, deg Unẓul-asamar n waɣir n Bgayet, acḥal n yimezdaɣ ur d-nqeṭṭu iqeddicen-nsen, deg wakud i ssaramen, seg tedbelt n tɣiwant yal mi ara gen yiqeddacen-is lficṭa s teɣzi n kraḍ neɣ ukuẓ n wussan. « Lficṭat-a i yezgan ttwaheggayent-d sɣur yixeddamen n tɣiwanin, ur ffiɣent ama ɣef ugdud ama ɣef tmurt d tdamsa-ines. Amek ara rzuɣ ɣer tɣiwant-iw, ad iyi-ɛellen lkaɣeḍ deg wass yeldin, taggara ad iyi-d-inin ur nqeddec ara ass-a. Abeɛda ma yella sriɣ s teɣseb i lkaɣeḍ-nni », i d-yenna yiwen n umezdaɣ n Ayt Smaɛel. Akken tella liḥala, ulac deg-s ayen yesbensayen. Imi, akken i d-tewwi teɣbalut-nneɣ, yezmer wurrif n yimsutren-a, ad ten-idegger ad d-siwlen i lficṭa taɣelnawt deg yakk tiɣiwanin n 48 n twilayin, ma yella ikemmel yesɛuẓẓug uɣlif i wayen i d-qqaren.
M. K.