Yiwen yiwen i ttensaren wid i d-yebnan tutlayt n tmaziɣt, i tt-id-yessawḍen s anda akka tella. S yinadiyen akked tira i swayes i d-neǧren abrid. Akken i yenna Dda Lmulud ‘’Ma yemmut umɣar neɣ tamɣart seg tmurt n Leqbayel, amzun d tamkerḍit s lekmal-is i iruḥen’’. Tikkelt-a, ɣas mačči d tamurt n Leqbayel i tt-id-yeǧǧan, maca din i tedder, i teqdec, i tessen uffiren n tmetti taqbaylit. Tigi, d snat n trumyin, xedment d tifremliyin deg sbiṭar n Micli acḥal n yiseggasen. D ayen i tt-yeǧǧan nettat d tmidawt-is tekcem-itent leḥmala n teqbaylit, dɣa cemmrent i yiɣallen akken ad gent adlis meqqren i uselmed n tmaziɣt s tarrayin ifazen d tugniwin icebḥen, s ubrid n tusnalmudt, d win iwumi semmant TIZI WWUCCEN. Tigi d Madeleine Allaine akked Lucienne Brousse, taneggarut-a, temmut ass n umhad yezrin ɣef usemmud n 88 n yiseggasen di tmaneɣt n Fransa, Paris. Tella d tamḥaddit n ugerruj adelsan n teqbaylit. Ad yeqqim yisem-is deg umezruy ɣer tama n wid akk i d-yernan abaɣur i tutlayt n tmaziɣt. Ad testeɛfu di talwit.
Khaled. A