APOCE, d yiwet n tddukkla taɣelnawt i yessehbibiren ɣef umsider (consommateur ). Texdem tasestant ɣef taɣara n lqahwa i yettnuzun di tmurt-nneɣ, syin heggan-d yiwen n usarag i d-yeḍran ddurt iɛeddan akked yineɣmasen. Berḥen-d ɣef yigemmaḍ i d-uffan. Ufan-d 5 n yismawen n leqhawi i yettwaqeblen maca, azal n ssker i yellan deg-sent, tuli ciṭ ɣef wayen i yettwajerden deg uṣaḍuf i d-yennan d akken ilaq kan 3% n ssker ara yilin. Syin, ufan-d sin n yismawen n leqhawi ur lhint ara maḍi, imi ufan-d deg-s aṭas n ssker. Ma yella d tid yelhan, iberreḥ-d uselwan n tddukkla taɣelnawt s yismawen-nsent, tigi d : Many, Ammar, Bonal, Africafé, Nizier. Am wakken i d-teffeɣ tddukkla-a s yiwen n lamer, d akken mbeɛd kraḍ n wayyuren, ad ɛawden tasestant. Syin ma yella ufan d akken luzinat-a, ur teddunt ara akked usaḍuf, a-t-an ad ttwaṭṭfent leryuyat mgal-nsen. Tesɛa tddukkla iserrawen (bureaux) deg waṭas n lwilayat, gar-asent Tizi Uzzu iɣef yella d aqerru Mass Abdel Hafid Bourezg, i d-yessewjaden yiwen n wahil s teɣzi n useggas. Ad nemmeslay fell-as s ttfasil deg wussan id iteddun.
Yamani Souhila