Liḥala n dir n ubrid di taddart n Bumahni, i d-yezgan deg tɣiwant n Ɛin Zawya, d aɣebel ameqqran u n waṭas aya. Ɣef wanect-a, dɣa, i xedmen, ass n, 15 deg wayyur-a, yinehharen n tkeryas n uṣiweḍ i yettawin si taddart n Bumahni ɣer temdint n Buɣni yiwen n usunded war tilist (grève illimitée) imi akken i d-yenna yiwen seg yimezdaɣ n taddart ‘’Liḥala n ubrid ur tgerrez ara, yal tikkelt nessawal i yimḍebbren akken ad d-rren ɣef teɣri-nneɣ, maca ulac win i d-yeslan. D ayen i aɣ-yeǧǧan ad nemsefham akken ad nebdu asunded’’. Ikemmel deg wawal-is: ‘’Abrid, acḥal d aseggas-aya nutni qqaren-d ur t-nxeddem ara alamma ɛeddan waman. Syin iɛedda lgaz, ar tura ulac d acu i yettwaxeddmen. Liḥala, simmal tleḥḥu ɣer deffir. Asunded-agi, yegla-d s yiɣeblan i yimezdaɣ ur nesɛi ara tikeryas. Abrid seg umkan iwumi qqaaren ‘ la cité Michel ‘ arlamma d taɣiwant taqdimt n Bumahni, ad nernu abrid i yettawin ɣer taddart Iferḥaten d win i iraben’’. Rnu ɣer wanect-a, taɣiwant n Ɛin Zawya, ur tesɛi ara, ar ass-a, aselway imi llant-d kra n cwalat gar yikubar. Aya, yegla-d s waṭas n leɛḍilat. Ssawalen yimezdaɣ n taddart n Bumehni i yimḍebbren n tɣiwant akken ad d-sslen i tiɣri-nsen , acku liḥala anda yewweḍ ubrid mačči d tin igerrzen maḍḍi. Asenfar-agi n ubrid, ilaq ad t-id frun .
Y. S.