AṬṬAN N CHOLERA - Yewweḍ wuṭṭun n yimuḍan ɣer 62

Ur iḥuza ara Tizi Uzzu akked Bgayet

DDK 10-09-2018 1604

Ulamma ur yemmiɣ ara aṭas waṭṭan-agi n Choléra, i iḥuzan setta n lwilayat n tlemmast n tmurt, ideg ara naf: Blida, Tipaza, Lezzayer Tamaneɣt, Lemdiya, Ɛin Defla akked Tubiret. Maca, ar ass-a, ur d-yeli usekles n kra n liḥala n waṭṭan-agi deg lwilaya n Tizi Uzzu akked tin n Bgayet. Xas ulamma, niqal yekker uhetwir deg yiẓeḍwa inmettiyen (facebook), ɣef usekles n snat n liḥalat n lehlak s waṭṭan-agi deg Bgayet, maca yesskadeb annect-agi, Mass Atmane Mehdi, imḍebber n teywelt deg ssbiṭar n Khalil Amrane n Bgayet. D ayen i yeǧǧan imezdaɣ n snat-agi n lwilayat (Bgayet akked Tizi Uzzu) ad rtiḥent i uɣbel-agi, acu kan « Leḥder yugar leqḍeɛ », am wakken qqaren. Ma ɣef yisallen ineggura ɣef waṭṭan-agi, iberreḥ-d uɣlif n Tdawsa, yimezdaɣ akked uṣeggem n ssbiṭarat, s usekles 62 n yimuḍinen i yuḍnen n Choléra akked 62 n liḥalat ideg i d-tban tibawt-nsent, seg 173 ikecmen ssbiṭarat n tmurt seg wass-nni n 7 ɣuct yezrin. Si tama-nniḍen yenna-d: «Ulac win yernan yemmuten, ala tamattant n sin i skelsen deg lwilaya n Blida». Tessuffeɣ-d ass-nni n ttlata teɣlift n tezmert, yiwen wulɣu amaynut i d-isegzan beṭṭu n liḥalat-agi ɣef lwilayat i iḥuza waṭṭan-agi. D lwilaya n Blida i iḥuza s waṭas, ideg ara naf 30 n yimuḍan, deffir-s d lwilaya n Tipaza s 14 n yimuḍan, deffir-s kan d Lezzayer tamanaɣt s 13 n yimuḍan. Di Tubiret llan tlata n yimuḍinen, ma di Lemdiya akked Ɛin Defla ala yiwen n umuḍin iskelsen, i yal yiwet deg-sent. Ma d 62 n liḥalat-nniḍen ideg ccukken di tazwara, iban-d deg-sen ḥellu. Ma d isalli aneggaru, i d-yeffɣen ass-nni n lexmis tameddit, yeqqar-d belli azal n 120 n yimuḍan i yeffɣen ssbiṭarat mebɛed mi ḥlan, dayen ara d-yssalin liḥalat n ḥellu ɣer lqidar n 61%.

Ghani Amazigh

AUSSI DANS NOS ÉDITIONS...

Plus de Tamazight