Ajdid deg ccna

Iɣaḍ-iyi lḥal d amaynut n Louizini Arezki

DDK 10-09-2018 959

Iɣaḍ-iyi lḥal d amaynut n Louizini Arezki

Yerna-d ucennay Louizini tasfift n ccna tamynut, ɣer umecwar-is n ccna, i yexdem netta s timmad-is akked tmedyazt Ouiza Ait Gharbi. Dɣa, deg tesfift-a tis snat n 2018, i wummi isemma «Iɣaḍ-iyi lḥal» n wazal 42 n ddqayeq, llant deg-s ṭamet (8) n tezlatin. Yal tizlit s usentel-ines, s tikti-ines. Di tezlit tamezwarut «Lmektub», anda i t-yesseḍlam, yeqqar-as di tazwara n tezlit : « A lmektub, inni-d ayɣer ur d-tseqsaḍ fell-aɣ ». Ma deg tis snat, isemma-s «Am yessawal wul-iw», i yecna ɣef tayri. Deffir-is kan, d «Itbir» i d azwel n taɣect tis tlata, anda i iceggeɛ itbir-is ad yesteqsi ɣef tin iḥemmel, acu kan ur as-yewwi ara lexbar-is. Deg tezlit tis rebɛa «Amek i truḥ», yexdem s usḥisef, anda i d-yefka ddeqs n yisteqsiyen ɣef wamek i d as-truḥ. «Yeǧǧa yemma-s» d wagi i d azwel n taɣect tis 05, ideg i d-yewwi awal ɣef yinig n yilmeẓyen iqbayliyen, yettaǧǧan tiyemmatin-nsen, yeqqar-as deg wafir amezwaru : «Ahya taqbaylit, mmi-m i d-rebbaḍ iruḥ. Yeǧǧa-kem a tawaɣit…». Tizlit tis setta «Iɣaḍ-iyi lḥal», d azwel-ines i d-as-yefka i walbum-agi amaynut, anda i d-isebgen lɣiḍ-is ɣef tegmat gar leqbayel d watmaten, dɣa yeqqar-as : « Iɣaḍ-iyi lḥal ɣef gma ɛzizen, yeṭṭef afus i yimcumen / Iɣaḍ-iyi lḥal ɛman-as allen, yeddan di leɛwayed-nsen », yessḥassef daɣen ɣef lmut n Matoub Lounes, anda i d as-yenna : Iɣaḍ-iyi lḥal ɣef wanni akken yemmuten, yefka tarwiḥt-is d asfel, ɣef widak ur yuklalen». Syin akkin, d «Tejra n leḥlu», i d tizlit tis sebɛa deffir-s kan deg umḍiq wis tmanya «Temdel tewwurt». Ayen i d-yernan ccnaḥa i tesfift-agi s ufella s tira s yisekkilen n tifinaɣ ɣer tama n widak n tlatinit, ma ɣer daxel d aẓawan atrar i yerrnen sser i yimeslayen lqayen. Ɣer taggara, ad d-nesmekti belli tasfift-agi “Iɣaḍ-iyi lḥal”, d tis snat i d-yessuffeɣ deg useggas-agi n 2018. Mebɛed tinna i wummi isemma «Asawen», i d-yessuffeɣ deg tazwara n useggas-agi.

Ghani Amazigh

AUSSI DANS NOS ÉDITIONS...

Plus de Tamazight