Accueil Tamazight Ilaq ɣef Iimsizewren ad aznen idlisen-nsen send 10 tuber 2018

Arraz Aseklan n Assia Djebar : Ilaq ɣef Iimsizewren ad aznen idlisen-nsen send 10 tuber 2018

500
- PUBLICITÉ -

Imsizewren yebɣan ad ttekkin deg tezrigt tis 4 n Warraz ameqqran n wungal “Assia-Djebar”, yessefk ad ceggɛen ungalen-nsen uqbel ass n 10 tuber i d-iteddun. D isalli, i d-yeffɣen deg yiwen n ulɣu n n tkebbanit n Termist taɣelnawt n teywalt d usizreg akked udellel (Anep), i d-yettheggin yal aseggas arraz-agi aseklan. Ma ɣef tegnatin n uttekki, yenna-d uɣbalu-a, ilaq d imsizergen ara yessersen idlisen ara yettekkin deg temsizzelt, yerna yessfek ad yili usersi-nsen ɣef 10 n tsukinin (exemplaire) i yal azwel. Am wakken daɣen i ilaq ad d-yili deg tesɣimin n (ANEP), akked Tkebbanit taɣelnawt n tẓuri d usizreg (ENAG), i d-yezgan i snat deg Lezzayer tamaneɣt. Ilaq diɣ ad ilin wungalen swayes ara ttekkin d imaynuten, ttwarun s tlata n tutlayin-agi: taɛrabt, tamaziɣt akked tefransit. Ala ungalen ay d-yeffɣen deg tmurt n Lezzayer yerna uran-ten yimeskaren izzayriyen i yesɛan azref ad ttekkin deg warraz-agi ameqqran. Iswi n temsizwert-a, d asebɣes n tira n wunagal akked usebɣes daɣen n yineggalen. D asiher i d-yettuɣalen yal taggara n useggas, i ttraǧun s ccuq yimura akked yimeɣriyen. Tettili-d tesfugla n ufraq n warrazen deg waggur n duǧember n yal aseggas, anda i d-ttifriren tlata wungalen, yal yiwen si yiwet gar s tlata n tutlayin-agi: taɛrabt, tamaziɣt akked tefransit. Yal ameskar ara irebḥen arraz-a, ad yawi amelyun n yidinaren. Mebɛed ass n 10 tuber 2018, ara yilin d ass aneggaru n usersi n wungalen ara i ttekkin deg tezrigt-agi tis rebɛa, ad tili tɣuri n wungalen-agi sɣur taseqqamut n ufran, ideg ara ilin yimura d yimussnawen n tsekla, tlata n tutlayin-agi i d-nebder yakan. Yetturaǧu ad tili tisfugla n ufraq n warrazen-agi, deg taggara n waggur n duǧember 2018 deg Lezzayer tamaneɣt, ideg ara ttwassnen yismawenn n wid irebḥen deg umsizwer n useggas-a, akken i d-yedda deg wulɣu-nni, acu kan ur d-yebdir ara azemz n tukci n warraz-a. Ad nesmekti kan belli, arraz-a, fkan-as isem n Assia Djebar yellan d tamarut, d tanmezruyt yerna d tamseḍrut, i lmend n wazal d ubaɣur i d-tefka i tsekla tazzayrit s tama, akked tsekla tamaḍlant si tama-nniḍen. Ɣer taggara, ad d-nini belli, arraz-a, snulfan-t-id i tikkelt tamezwarut deg tezrigt tis 20 n Rreḥba tagraɣlant n udlis n lezzayer (SILA) i d-yellan deg waggur n unbir 2015.

- PUBLICITÉ -

A. A.

- PUBLICITÉ -