Deg tazwara n ddurt iɛeddan, 14 deg waggur n cutember 2018, i d-thegga Teseqqamut tadigant n Yitri azeggaɣ s tallelt n Tiddukkla tazzayrit n tgemmi, n Twenadt d unegmu n talsa, yiwet n terkeft (caravane) n tdawsa i lfayda n imezdaɣ n tɣiwant n Mɛatqa. Tella-d terkeft-a deg uɣerbaz amenzu Takour Mohammed deg umḍiq iwumi qqaren Zlibu. Tuget n yiḥricen n tujjya, llan deg ttiɛad, ama d imejjayen n wul, imejjayen imatuyen, imejjayen n warrac imecṭaḥ, imejjayen i d-yelhan s waṭṭanen n tnefsit, imejjayen i d-yelhan s terbin…atg. Ɣef leḥsab n yisalen seg i d-glan yiɛeggalen n tddukkla d yiɛeggalen n teseqqamut tadigant n yitri azeggaɣ, ugar n 350 n yimdanen i yesɛeddan ɣef tdawsa-nsen deg yiḥricen n tujjya yemgaraden. Ferḥen nezzeh yimezdaɣ n dayra n Mɛatqa seg tcetlin yecban tigi, imi d tagnit i yimdanen i wakken ad walin addad n tdawsa-nsen, ad sɛeddin ɣef waṭṭanen i ten-iḥuzan, akken i naɛlem d akken dayra n Mɛatqa ar ass-a ur tesɛi ara axxam n tujjya igerrzen.
Ali Zalouk