Accueil Tamazight Acebbeḥ n uɣerbaz amenzu Tiɣremt

Seɛdan : Acebbeḥ n uɣerbaz amenzu Tiɣremt

524
- PUBLICITÉ -

Ulamma ur gtent tddukkliwin deg Yiderginen, maca yettili-d din taggara-a uḥerrek n umussu asdukklan. Akken tebɣu tili tewɛer tudert, neɣ ur gerrzent tegnatin tinmettiyin, acu kan ttnekkaren-d yilemẓiyen i itett wul-nsen, ɛerrḍen ad d-awin kra n tmerna i wakal anda lulen. Daymi, seg tikkelt ɣer tayeḍ yettili lebɣi n tlemẓiyin d yilemẓiyen deffir wayendin d tigawin yelhan, i yuklalen ad yemmeslay yiwen fell-asent. Deg tɣiwant-a n Yiderginen dɣa, 45 n yikilumitren ɣer usamar n temdint n Bgayet, tessuddes-d ussan-a iɛeddan kan tddukkla Tilelli n Seɛdan, ur nesɛi ḥawla segmi d-tlul, yiwen n warmud s wazal-is i urqam d ucebbeḥ n uɣerbaz amenzu Tiɣremt n Seɛdan n taddart-nsen. Tlul-d tekti akken ad d-tawi kra n tumert i warrac, ad ḥemmlen ugar ad ttilin deg uɣerbaz-nsen, ad beɣɣun ad ɣɣaren ad rennun. Wid i d-yessawlen i tigawt-a, fursen imuras n umwan n 4 n wussan ideg ferɣen yiɣerbazen merra, i d-yellan seg 31 tuber armi d 4 unbir, akken ad kkren i uqeddic-nsen, ad t-ssamden send ad uɣalen yinelmaden. Seg wayen i nezmer ad nwali mi kkfan yinaẓuren ccɣel-nsen, d unuɣen n yiɣersiyen s umata, abeɛda asaḍen n wunuɣen yettewliwilen i ṭṭafaren yigerdan. Ad d-nesmekti d akken amahil-a n usebhu yella-d ar tura i kra n tneɣriyin kan, imi yezmer lḥal ɣer sdat ad ikemmel mi ara d-tas tegnit. Am wakken daɣen, ɣef wawal n yiɛeggalen n tddukkla Tilelli n Seɛdan, ad d-yettwaheggi wayen-nniḍen sɣur-sen deg wussan i d-iteddun.

- PUBLICITÉ -

M. K.

- PUBLICITÉ -