Aḥric wis 2
Yers-d yiḍ, iceggeɛ-d ugellid stut m lebtut ɣer uxxam anda yeggan urgaz. S tmes tesserɣ-as allen-is almi yedderɣel, ṭṭfen-t di 20 yid-sen, refden-t, wwin-t, ḍeggren-t ɣef yiri n yilel. Ǧǧan-t dinna akken ad-t-ččen wuccanen. Acḥal yewɛer lexdeɛ, deg wul n urgaz iḥerreq, yekker, yeggul ad d-yerr ttar. Yekcem ɣer yilel, allen-is smarayent idammen. Yewwi abrid gar waman, yessared anezgum s temreɣ n yilel, yesserɣ urfan s lḥammu n yiṭij, iteddu kan, ur yeẓri sani. mi yewweḍ ɣer yiwen uẓru, isenned, yerẓa-t ɛeggu, yewwi-t nadam. M id-yuki si tnafa, yufa iman-is deg ussu, sdat-s iḥulfa i tmeṭṭut, yemḥaḥed, yebɣa ad yekker, tenna-as : « Tbaneḍ-d d amennay, neɣ d anegmar, sgunfu ur ttagad ». Tɛawez fell-as 7 n wussan, d 7 n wuḍan. Yal ass, tseffaḍ-as allen-is s tḥergiwin (potion magique), armi d ass-nni i deg i d-yeldi allen-is. A tafat i d-yeflalin fell-as, a tayri i t-id-yeqqsen, mi yeẓra tameṭṭut i t-id-ijemɛen. I yecbeḥ uglim-is, i zuggaɣ-it tcenfirin-is, ɣef tuyat yeɣli-d umzur-is. Yeẓra-d tiziri deg uzal, yeshetrif wer aṭan, teqqes-it-id tayri. Deg wul-is ṭṭreḍqen yiḥulfan, ifeggeḍ d leḥmala, yesmar-d asirem. Tameṭṭut ula d nettat d tanegmart, aneccab-is (flèche) d usdid, werǧin yezgel tanegmirt (proie). Tetteddu d yiɣersiwen, anda truḥ ad dduklen yid-s. Zgan wuccanen d izamaren, iqejjan, iwtal, ifrax, tizerzert d izerzaren. S anda ma tedda, tedda tenguft-is (escorte), ttcalin deg teẓgi, am wakken ttcalin yiselman s ddaw waman. Meɛna mačči ala iɣersiwen ukkud teddukkul. Ɣur-s tiklatin, gar-asent llant 7 n tyessetmatin, teddunt yid-s, qeddcent fell-as, xeddment leḥruz imi d tiwkilin. Yal ta tif uletma-s : Tamezwarut, ṣṣut-is d aleggaɣ, mi ara d-tecnu awaɣezniw yettuɣal d llufan ; tis-snat, tessen i uẓawan, mi ara tetturar snitra ula d Rebbi yeggan ; tis-kraḍet, tessen i ccḍeḥ yettban, mi ara thuz tuyat, deg uzal ttirriqen yitran ; ma d tayeḍ, d tanaẓurt s ccan, s yiniten tesbeɣ ula d igenwan. Uletma-s, tettbeddil timeqwa n waman, yis-ent txeddem iseɣwan (bijoux). Tikent-is, tgennu tiksiwin mebla lkettan, tettfeṣṣil tirkasin s lmerǧan. Taneggarut, tif di ssifa kra yellan, yewwi daɛwessu kra itt-iwalan. … Tettkemmil
Seg tsekla taqbaylit