Seld tiɣimit kra n wakud di Tmurt, yuɣal yekcem Zedek Mulud ussan iɛeddan ɣer Fransa i lmend n ugala n ccna i yellan yettraǧu-t i wass n, 10 unbir 2018, di Lberj n Tegmat (Palais de la Mutualité). Ɣer taggara-a n tmeɣra-a dɣa, d temlilit akked wid i t-iḥemmlen, thegga-as-d tddukkla tadelsant taqbaylit Tamurt n temdint n Lyon, i ibedden ula i uneḍruy-a, yiwen n warraz n tmedyazt taqbaylit tamḥaddit. Tettunefk-as cciɛa-a s yifassen n Nadiya Meɛtub, taǧǧalt n uɣewwaɣ Lwennas Meɛtub, deg tegnatin n uceqqer d usebɣes n uzayez i d-yerzan iḍ-nni. Ilaq ad d-nini wid ixemmen i warraz-a, nwan ad snemren yis-s mmi-s n At Xelfun ɣef wayen i d-yewwi, i d-yettawi, i tmedyazt taqbaylit s umata. Ama si tama n temḥaddit, aswir, ccbaḥa akked useḥbiber ɣef yidles d tnaslit. Ad d-nesmekti d akken iɛedda akken iwata usihar-a n ccna n Zedek Mulud di Lyon, imi aṭas i as-iḥeḍren d tiwaculin neɣ d imeddukkal. Ula d tisin, usan-d seg waṭas n yimeḍqan yeggugen cwiṭ, am tmurt n Swis, Paris, Saint-Etienne, Marseille d temdinin-nniḍen. Ayendin d tizlatin i d-yecna unaẓur gar teqburin d tmaynutin, s tallelt n uzayez-is i icennun seg tikkelt ɣer tayeḍ yid-s deg tegnatin i ten-yezdin. Tura akka, mazal tettsemmid tuzzya-s n 2018/2019, ma neẓra ass n, 12 di yennayer 2019, ad yeg agala-nniḍen di temnaḍt n Reims, i usfuggel n yixef n useggas amaziɣ 2969. Kra n wussan kan ɣer sdat, 19 di yennayer, ad yili daɣen di Toulouse i Yiqbayliyen d Yimaziɣen i yettidiren dinna.
M. K.