Mbeɛd mi ugten wuguren i d-ttmagaren yisdawanen yeqqaren deg tesga n tmussniwin, ideg llan yigezda-a: tafizikt, takrura d tusnakt, gezmen-tt di rray ass-nni n lexmis tasebḥit n wass, ɣelqen yinelmaden n useggas wis tlata n turagt agezdu n tekrura (chimie). Maca uqbel-aya, llant-d snat n temliliyin akked uɣella n ugezdu-agi d umɣar n tesga n tmussniwin, acu kan tineggura-agi ur d-glint-a s kra. Rnu ɣer waya, lɣiba n uɣella n ugezdu n tekrura i umekkan-is i wazal n ddurt, dayen i yesnuɣnan inelmaden n ugezdu-a, yettemririɣen deg yiɣeblan.
Ma ɣef wuguren i ttidiren yinelmaden-agi deg ugezdu-nsen neɣ deg tesga-agi s umata, ad d-nebder: yir aqadar n yinelmaden sɣur Mass Lateb, yellan d aɣella n ugezdu n tekrura; yir aqadar n ulugen asdawan i d-yeqqaren: “Anelmad, ilaq ad isɛeddi akayad n usenfel (remplacement) uqbel win usellek (rattrapage)”. Rnu ɣer usefcel n yinelmaden s tezmilin, imi ɣef leḥsab n yiɛeggalen n teseqqamut n yinelmaden n ugezdu-a, llan yinelmaden i iɛeddan akayad n usellek (rattrapage), ttawin-d yiwent n tezmilt; d tin ur tettbeddil ara neɣ tettsubu ɣef tmezwarut-nni. Ttketcin imi deg wawal qqaren, ḥersen iman-nsen yinelmaden n yal aswir, ma di tezmilin ulac.
Am wakken daɣen i d-jebden taneqqiṭ-nni n 20 % n yinelmaden n Master ara ilin d iberraniyen ɣef tesdawit n Tizi Uzzu, iwumi ur d-yufi ara umɣar n tesga-agi tifrat, imi ireggem-asen deg wussan iɛeddan, maca d awal kan. Yella diɣ wugur n uɛelleq n tezmilin n yikayaden n ṭṭlaba (datte), imi ttɛeṭṭilen deg-sent, ɣer tama n ugellel i sɛan deg useggas asdawan 2019/2020. Ma ɣef wayen ssuturen yinelmaden-agi, yenna-d yiwen gar yiɛeggalen n teseqqamut n yinelmaden n ugezdu-agi n tekrura : “Inelmaden n ugezdu n tekrura, la as-qqaren i uɣella n ugezdu Mass Lateb, kker ad telḥuḍ, ma ur tezmireḍ ara i temsal-agi, eǧǧ amkan i wiyaḍ”.
Ikemmel yenna-d : “Nessutur diɣ, tifrat i wuguren-agi akk i d-nefka, ulamma ur ten-id-nekfi ara akk, imi d wigi i ilaq ad frun s tɣawala”. Ɣer taggara, ad d-nini belli ula d iḍelli n lḥed, 20 tuber 2019, yeɣleq ugezdu-agi n tekrura. Am wakken diɣ i tezmer ad teɣleq akk tesga n tmussniwin ma tkemmel akka, imi ula d sin-nni n yigezda-nniḍen ur ten-zgilen ara wuguren-agi.
A. A.