Asenfar n uεawed n yiqadussen n waman n tissit, yebdan ugar n xemsa (05) n yiseggasen-aya, mazal-t ar ass-a yessekkar-d lɣiḍ n yimezdzɣ n tudrin n tɣiwant n Mεatqa s sebba n leεḍil i d-yellan, d ubellez n uxeddim deg usenfar-agi. Sdat n usεuẓzeg n tmeẓzuɣt n yimḍebbren teεna temsalt ɣef wayen ssuturen, beggnen-d yimezdaɣ n taddart n At Zεim lɣiḍ-nsen s uɣlaq n tdublayt n uḥric n waman n dayra n Mεatqa, deg wass n lḥed iεeddan, 03 deg waggur n Maɣres 2019. Ssutren yiεeggalen n teseqqamut n taddart, deg yimeḍebbar amezwaru n dayra n Mεatqa s uneḥbus n yimḍebren n tdublant-agi ur yeselḥayen ara lecɣal akken iwata.
Rnu ɣef waya, tifrat n yakk iɣeblan i icudden ɣer usenfar-agi yettabaεen ɣer tenmehla n ugla n waman. Seld lḥars smersen yimezdaɣ n taddart ɣef yemḍebren, yella-d yiwen unejjmuε deg uxxam n dayra n Mεatqa, anda ḥeḍren yakk yimḍebbren teεna tamsalt, ama d imḍebber n Dayra n Mεatqa, imeḍebbren n tenmehla n ugla n waman, imḍebbren n tdublayt n uḥric n waman n Mεatqa, imeḍebbar n tsemsart n waman, amεellem n tkebbanit tamaynut yeṭṭfen asenfar, srabes n laman, iεeggalen n teseqqamut n taddart n At Zaim, iεeqqalen n useqqamu aɣerfan aɣiwan n Mεatqa. Heḍren-d yiεeggalen n teseqqamut n At Zaim s lɣiḍ meqqren ɣef yiɣeblan i icuden ɣer usenfar n uεawed n yiqadussen n waman n tissit, yebdan deg useggas n 2014.
Asenfar-agi n 3 wagguren, yeggra-d deg 05 n yiseggasen. Mmeslayen diɣ s waṭas ɣef ubellez n uxeddim n tkebbanit tamezwarut s utteki n yiεeggalen n tdublayt n uḥric n waman n Mεatqa i d-yelhan s usenqed n usenfar. D ayen i d-ixelqen leεḍil meqqren. Dɣa deg wagguren iεeddan, seld tulya n waman deg yiqadussen-agi imaynuten n PHD, yeḍra ubaxix, anda ara naf ugar n 300 n yinsigen n waman deg taddart kan weḥd-s. Aya, yessekker-d lɣiḍ n tkebbanit tamaynut i d-yelhan s ukemmel n usenfar. Imeḍebber n tmehla n ugla n waman n ugerzu n Tizi Uzzu, yewεed imezdaɣ s tifrat n yal iɣeblan i icudden ɣer usenfar-agi, d uḥbas ɣef uxeddim n yimḍebbren n tdublayt n uḥric n waman n Mεatqa. Yewεad, diɣ, s keffu n usenfar deg kra kan n ledwar.
Ɣer taggara n lejmeε, rzan yimeḍebbren teεna temsalt ɣer usenfar i usenqed n ubellez yellan, d lexṣas n usenfar-agi. Syin, yewɛed umεellem n tkebbanit i d-yelhan s usenfar s keffu-ines deg waggur. Ɛezmen yimezdaɣ n taddart n At Zaim, seg lejjiha-nsen, ad ɣelqen yakk srabes n uwanek, ma yella ur d-yelli ara wayen akk waεden yimḍebbren teεna temsalt.
Ali Zalouk