D iseggasen tura segmi sutren yilemẓiyen n Yiderginen deg yimḍebbren n tɣiwant-nsen i waken ad asen-d-gen annar aɣiwan iwulmen ideg zemren ad ssemrasen kra n waddal, abeɛda ddabex n uḍar. Ilaq ad d-nini d akken tettuneḥsab tɣiwant-a gar tid i ixussen ayendin deg ttawilat d yibenyan i yemmuggen i yilemẓiyen.
Dɣa, ma nekkes annar n taddart n Seɛdan, i yettwadlen taggara-a s tuga tamacinant, ula d annar aɣiwan n tɣiwant-a, i d-yezgan deg wul n Yiderginen, mazal ur yettwadel s tanga-a tazegzawt i ssuturen yinaddalen. D acu kan, mi d-yeffeɣ usenfar ayyuren-a yezrin, lecɣal n ureqqeɛ d yidil-is a-ten-an teddun akka tura. Ɣef wakken i d-tewwi teɣbalut-nneɣ, ad d-yekker usenfar-a s wugar n 4 n yimelyaren n santim, imi deg-s idil n unnar s ugazun, lebni n ufrag n wuzzal akked usbedd n kra n tseddarin i yimferrǧen.
Am wakken i d-yedda deg-s daɣen lebni n texxamin n usucef d ubeddel n yiselsa. «Yeffeɣ-d usenfar n ureqqeɛ n unnar n Yiderginen s wazal n 42 n yimelyan n udinar, i lmend n tedrimin tiɣiwanin n tneflit (PCD). Akken nemsefham akked termist i t-yeṭṭfen, ad yekfu iqeddicen-is merra deg 20 ɣuct», i d-yenna yiwen n wufrin di tɣiwant n Yiderginen.
Sya ɣer mi ara kfun lecɣal-is, ad ṭṭfen yilemẓiyen n Yiderginen di ssber, imi ayendin d iseggasen i urǧan ad yili iwata unnar-nsen aɣiwan. Abeɛda imi, i usmekti kan, ula mi ara tili tberza (tournoi) gar tuddar neɣ tiɣiwanin ttkukrun ad snubegten inebgawen-nsen deg unnar aɣiwan, ɣef tuggdi n tɣelyawt neɣ n truẓi deg unnar-nni. «Nessaram imi iɛeṭṭel annect-a, ad yemmag akken ilaq ɣer taggara. Meqqar ad nesɛu ula d nekni annar aɣiwan ideg nezmer ad nurar war tuggdi», i d-yenna yiwen n yilemẓi n Yiderginen.
M. K.