Gar-aneɣ d kra n yimalasen, ad d-tettwaheyyi yiwet n temlilit ur ncuba tiyaḍ, gar ddeqs n yimedyazen, iqburen abeɛda akked kra n yilemẓiyen i d-yetteflalin. Tella deffir uslal n tekti-a tmedyazt tuḥrict Massa Nadya Benɛmer, i yettidiren di Wehran, i yenwan ad d-tessemlil ddeqs n yimedyazen ɣef teɣzi n yiwen n wass, akken ad mbaddalen amciwer d tikta ɣef kra n tlufa n usefru, n tmagit d umennuɣ. Ad d-teḍru temlilit-a ass n, 04 deg wayyur n yebrir-a ara d-yasen, deg Lberj Ageldan n tɣiwant n Larbɛa Nayt Iraten, seg 09:00 n tsebḥit d asawen. Ɣef wawal n temheyyit, gar yiswan igejdanen n umlaqi-a, d aseḥbiber ɣef tgemmi iɣef qedcen waṭas di talliyin yezrin.
«Ayen i aɣ-d-sawḍen yimezwura seg zzman aqbur, yesnagay-d acḥal i meqqrit umezruy-nneɣ ideg tettwabna tɣerma-nneɣ. Ma yella ur d-nelhi yis-s, ur as-nefki akk allalen iwulmen iwumi nezmer, yezmer ad aɣ-yerwel seg kra n yiceqqiqen. D ayen i yeǧǧan tusa-iyi-d tekti-a n uheyyi n temlilit gar yimedyazen at wawal iǧehden. Deg-s daɣen d tajmilt i tmedyazt taqbaylit », akka i aɣ-d-tenna Massa Nadya Benɛmer. Dima ɣef wawal n Massa Nadya, « ɣas ulamma llant tddukkliwin i d-yesnulfan kra n temliliyin i yimedyazen akken ad d-ssenfalayen ayen bɣan, ɣef yal taluft, maca drus i yellan mi ara iwali yiwen uguren akk i yellan i usiweḍ, d wayen akk i d-yekkaten deg tutlayt-nneɣ seg waṭas n tamiwin ». Dɣa, tebda si tura ancad n yimedyazen i lmend n temlilit-a ara d-yettwasuddsen s uzwel n « Tafsut n wawal ».
M. K.