Tezweɣ tewweḍ-d imnaṛen, ccfeṛ yegguma ad yader. Kra yekka yiḍ d afares, d tamuɣli taneggarut ɣer wayen ur d-yeǧǧin deg-naɣ kra seg wasmi akka tesserhab teswiɛt. Ḥarcawet, tettraḥ-d ṛzaget teṛzeg n lmut iɣeṭṭmen isegman n leḥlu. Wa yebna fell-as, wa tɣufer-it-id i tikelt tamezwarut am zun d lɛid at laxart yeddren gar-aneɣ, deg-naɣ am yiḍ am wass. Ussan-a am win i ɣ-yettdɛan, tettawi meẓẓi meqqar, nɛuhed jenjaṛ i tiṭ skud teccelqaf deg-naɣ ayen akken i ɣ-yessidiren. Sya ɣer da ak-inin wagi neɣ tagi temmut yir lmut. Ḥzen ay iṭij ur cerreq! Yuɣal umeǧǧed d amwanes n yal ass. Yuɣal udekkeṛ d acewwiq n tudert deg ussan n ẓẓmik. Icewwiqen n leḥzen s nnuba i d-ttasen. Ulawen d tsiswa uẓamen awal, ṣṣura teccarew seg wayen i ẓrant wallen, aḍar yewweḍ anda ur yettaweḍ yiwen, axxam yeččuṛ d iferṭeṭṭa ixedmen tameɣra melba lḥenni, lheffa at laxart tedda d iqeffafen ara ynejṛen abrid i ynebgi n kul ass, ccbuḥ-is d ccac amellal ur nurid yiwen wass, azmumeg-is d acqirrew n lesnin d wayen i tezgel twenza-s. Anerfud-is aneggaru yebra-d i tsusmi, yunef-as i tcemmaɛt a taɣ di tɣerɣart am waken ara yaɣ usirem deg wulawen n win ur neqqid tasa-nnsen, yunef i wbuqal n waman ad iger irebbi i ymeṭṭi yemmaren d iḥemmal akken i d-yemmar igenni. Aman ad sswen akal, ad yellez yidim, ad llzent twenziwin.
Zira