Deg wass amenzu n tefsut, nettɛassa kan akka lfal amerbuḥ ansi ara aɣ-d-yekk. Diɣ netta, deg yimi ara d-teffel tmecraraqt n yiṭij s axxam d nekni d taɛessast : gma ɣef ṭṭaq nek ɣef wayeḍ, am zun akken werǧin nwala tafat. Maɛna tafat n wass-a tif-itent yak, ma tesself i ṣṣura-k ad tebru i ɛeggu, ad yennefsusi lxaṭer-ik seg yineẓman d dderk n iseggasen. Nesseḥmac kan ɣer dqiqa-nni deg ara d-nennejmaɛ d tezyiwin-nneɣ, ad nruḥ ad nmager tafsut. Akken kan ara tefrari tafat ad ncebbeḥ meṛṛa s rriḥa n tefsut ; mbeɛɛid i nettraḥ d ijeǧǧigen, nettawi ak tafsut deg yedmaren-nneɣ s wunuɣen d izamulen. Timlilit deg yiɣil n wammas, dinna i yeqwa leḥcic amezwaru n tefsut, yegma-d akken ilaq s waman n igenni d waman n terga i d-ttarran tlawin yal imi ara d-yeḥder lawan-is. Abrid iḍul ɣef wuḍar, maɛna ur nettfaq ara amek yettɛedday lweqt, din nebda tikli, din nuɣal-d s axxam, ilsawen-nneɣ cennun lalla tafsut m ijeǧǧigen, a tikli n tsekkurt…lḥasun lewqat am wigi d afares, azmumeg ɣef yimi, ajeǧǧiǧ ɣef yedmaren, taqendurt taxuxit, tikli ḥafi, gar yetran, tamuɣli akin i wedrar, tamecraraqt n yiṭij yemmalen iberdan..nnehta taneggarut, fiḥel ikufan, amur a t-id-nessayes war urfan..
Zira