Akken i as-yenna winna n zzman :’’ win ur nessin ad yels abernus, yessiked γer dadda-s’’. Mbeεd mi d-kkren yiselmaden n tmaziγt di Bgayet d Tubiret, wid ur nxeddem ara, ad ḍelben imekwan n uselmed, tura d iselmaden n tmaziγt n Tizi Wezzu i yebγan ad ḍefren abrid i wwin yimeddukal-nsen n snat lwilayat-agi n tmurt n Leqbayel. Ha-ten-in la d-ttheggayen yiwen n unejmuε gar-asen anda ara mmeslayen γef ttawilat ara sxedmen i wakken ad awḍen lebγi-nsen. Σlaḥsab n wayen i aγ-d-nnan kra, ad d-yili deg wussan i d-iteddun yiwen n yibeddi sdat n tenmehla n ttrebga n Tizi Wezzu. ‘’ Nekni nebγa lxedma xas ulamma berra n lwilaya n Tizi Wezzu. ’’ Akka i aγ-d-tenna yiwet deg-sen. Ma d A. A yenna-d :’’lukan ad bdun tamaziγt seg useggas amezwaru, tili ad ilin imekwan i yiselmaden akken ma llan. Meεna amennuγ-a yeεna akk iselmaden n tmaziγt n tmurt n Leqbayel neγ εad akk leqbayel’’. Ussan i d-iteddun ad d-beggnen,ahat, d akken amennuγ γef tmaziγt mazal γezzif.
Hocine. M
Aneḥbus γef laqraya : d tameγra n yinelmaden !!!
Acu n tγawsa i izemren ad tessefreḥ anelmad nnig n wass-nni mi ara yaweḍ s aγerbaz u ad as-d-inin uγal s axxam ur teqqareḍ ara ? Ad t-twaliḍ la yettreḥḥil yeqqar mazal. Yal wa d acu d-yessewjed din din ad t-yexdem. ‘’Nekk srid γer les jeux. Ur umineγ ara, ass kamel ad t-wwteγ d lεeb. ’’ I d-yenna Rafik. Ma d Massi yenna-d :’’ la d-nessewjad yiwet n temlilit n ddabex n uḍar di lḥuma. ’’ Nassim,netta, yesεa ttiεad akked temddakelt-is γef ttnac. Meεna anect ferḥen inelmaden i zeεfen yimawlan-nsen. Amur ameqqran deg-sen, ttawin-d arraw-nsen, ad ten-ssiwḍen s aγerbaz syin ad kemmlen nutni γer uxeddim, tameddit ad d-uγalen γur-sen. ‘’Ass-agi, ilaq-iyi ad uγaleγ s axxam ad rreγ mmi. Ur yezmir ara ad iruḥ weḥd-s. ’’ i aγ-d-yenna yiwen n ubabat. Amur ameqqran teddun-d d warraw-nsen i wakken ad asen-d-refden iqrben-nsen ; ẓẓayit mačči d kra. Ma d yiwet n tyemmat tettemyuzzam akked tselmadt, teqqar-as :’’acḥal n yidrimen daγen i tebγam ad awen-rnun ?’’ ‘’Ula d nekni nesεa dderya, qqaren, nettxemmim fell-asen’’ i as-terra tselmadt-nni. Skud aneḥbus γef leqraya yettkemmil, zzεef n yimawlan yettnerni, lferḥ n warrac ‘’d win yenekkmalen’’ akken qqarent temγarin !
Hocine. M