Agezdu n tutlayt d yidles amaziɣ n tesdawit n Tubiret yessudes-d deg wussan 24 d 25 di tuber yezrin tlata wussan n tezrawt ɣef umawal. D timlilit i d-yessemlalen isdawiyen n Tizi Ouzou, Bgayet d wid n Tubiret iwakken ad sqerden tamsalt n umawal d taluft yerzan asnulfu n yimeslayen imaynuten. 17 n yisaragen i d-yettwaheggan di temlilit-a tusnant anda s kra akk n win i d-yewwin awal ibeggen-d lixṣas yellan tura deg tutlayt tamaziɣt labeɛda ayen yerzan tusna. Ama deg tsekla neɣ iḥricen nniḍen, yessefk i yisdawanen ad d-snulfun amawal i s ara sseddun tikta d unadi. Aya, d ayen dɣa i yexdem Mohand Akli Salhi i d-yerran gar yifassen n yisdawanen yiwen n umawal yerzan tasekla. Ɣas akken d win yettwasnen deg uḥric n tsekla, maca asdawan-a yenna belli ayen akka i d-yexdem d ayen i izemren ad yifif, imi yettraju leryuy n yimeddukkal-is. Moussa Imarazène yewwi-d awal ɣef ureṭṭal n wawalen d wazal nsen deg tutlayt. D asentel s wazal-is imi tamaziɣt ass-a tesṭuqqet-d imeslayen seg tutlayin nniḍen. Ayadra, aya ma d ayen ara yesnernin deg tutlayt neɣ d asenɣes seg-s ? d wa i d asteqsi i d-iger usdawan-a. Taluft-a, ɣef leḥsab n M.Imarazène tebḍa ɣef sin n yeḥricen: llan wid yettwalin areṭṭal mačči d ugur, ur yelli d aɣbel, imi ad yesnerni di ccan n tutlayt i ixuṣṣen s waṭas ladɣa ayen icudden ɣer tusna. Wiyaḍ, d tamuɣli nniḍen i sɛan, imi bɣan yakan ad ssizedgen tutlayt. Timuɣliwin ggtent, imi aṭas i yebɣan ad segmen amawal s ujmaɛ n yimeslayen n tantaliwin i tekseb tmaziɣt. Ulamma mačči d ayen isehlen, maca ahat yezmer ad yettwaxdem. Dayen i yeǧǧan Samia Merzouki ad d-tawi awal ɣef yiwet n tirmit i yettwaxedmen di Canada ɣef useggem n tutlayt. D asentel ara d-yefken tikti i yimazɣawalen d wamek ara ddun deg umecwar i d-bdan akka. Aɣbel daɣ i d-yettubedren deg temlilit-a d win iɣef d-temmeslay Lydia Guerchouh ɣef wayen yerzan awal amaynut ara d-yesnulfu umdan d win ara d-yettwareḍlen seg tutlayt nniḍen. Ma d Hamid Ibri yewwi-d akka awal ɣef wayen i tesseqdac tmetti, iwakken ad d-yini belli ttlalen-d wawalen di tmetti yerna ttaɣen aẓar mebla ma yella-d kra n cweṛ n yimusnawen. D imdanen s yiman nsen i d-yesnulfuyen mebla ḍegren tiṭ ama s aẓar neɣ s asuddem n wawal. D ayen i yeǧǧan asdawan-a n Tizi Ouzou ad ijebbu tamuɣli-s ɣer yiwen n umawal n taywalt di tmetti, win ara yezdin imazɣawalen.
Ɣer taggara n temlilit, M.Djellaoui, s timmad-is d imḍebber n ugezdu n tmaziɣt di Tubiret yenna-d belli ttusbeddent tlala n tesquma ara d-yelhin d umawal.
Sylia.M