Gar-aɣ d kra n wussan, ad d-yaweḍ lɛid ameqran i ttrajun yigerdan s ccuq. D tagnit n lferḥ ɣur-sen, imi ssaramen ad lsen iselsa ijdiden yerna…ad ttekkin di tḥegga. Tamsalt n yiselsa, ahat mačči d aɣbel ameqran n yimawlan, akken tebɣu tẓeyyer liḥala, ad d-afen ttawil akken ad sferḥen dderya nsen. Maca, taluf n wufrik neɣ ikerri, d tin i d-yesrusun “buseṭṭaf” ɣef yimdanen. Amek ihi, ma nezzi-d akka deg leswaq n lmal i yettilin deg waṭas n yimukan, ad nedhec ɣef ssuma i nsel seg yimawen n wid yeznuzun izamaren. Ass-a, ma yebɣa umdan ad d-yaɣ ayen ara ččen yiɛeggalen d wayen ara yawint twelliyin, ilaq ad d-yessewjed nnig n sin n yimelyunen n ssantim. Wigi yettrebbin lmal qqaren-d leɣla-agi yekka-d seg leɣla n yisafaren i tetten yiɣersiwen-agi. Wid ara yaɣen, ttuɣun seg ssuma i slan, imi d tin yejban i tezmert nsen. D ayen i yeǧǧan ass-a imdanen irkeb-iten lḥir amek ara qablen taswiɛt. Tawacult teṭṭamaɛ, taxriḍt tenneqdaɛ !
Sylia. M