Ass n ssebt yezrin, taddart n Koukou i d-yezgan di tɣiwant n At Yeḥya di Micli tesmekta-d tamettant n yiwen seg warraw-is i teḥwes tmettant ɣef 43 n yiseggasen di lɛemr-is. D tarbut n 40 n wussan i yellan yakan seg yinsayen, i d-yessemlalen tawacult n At Ɛmara akked leḥbab n umennuɣ n win akken yellan d tafat. Seg Tubiret ɣer Bgayet tezziḍ-d ɣer Tizi, udmawen n yimeɣnasen n tmaziɣt rzan s aẓekka n Nour. Argaz tameṭṭut, bedden ɣer yidis n twacult n At Ɛmara ladɣa Samia iwakken ad asen-sefḍen imeṭṭawen. D aɣerbaz amenzu n taddart-a i yeldin tiwwura-s anda i d-tella temlilit tasebḥit n wass anda i d-yettwahegga yiwen n wahil d amerkanti. Uqbel ad rzun s aẓekka anda ara ters tmeqqunt n yijeǧǧigen, yella-d wawal ɣef ṛṛuḥ n Nour. D tameṭṭut-is Samia i d-yennan : « Nour, ulamma di lɣerba, ur yesseɣres ara aẓar i t-yezdin d tmaziɣt d yiselmaden n tmaziɣt. acḥal yesḥassef deg wussan ineggura n tudert-is ɣef liḥala ideg yella uselmed n tmaziɣt. » A. Ɛerqub, s yisem n tiddukla n yiselmaden n tmaziɣt n Tizi wezzu yesmekta-d amecwar i d-yewwi Nour ladɣa seg useggas n 1995. Lmir n tɣiwant n At Yeḥya, T. Benslimane yemmeslay-d am wakken yexdem ass n temḍelt n Nour, yerra tajmilt i kra n win iteddun ɣef tmaziɣt, yessaram dakken abrid n mmi-s n At Ɛmara ad ḍefren wiyaḍ. Nna Ḥammama, yemma-s n Nour, ulamma taɣbelt tkerres-as tagerjumt, terra tajmilt i wid akk i d-yusan ad tt-wansen di teswiɛt-a taqesḥant. Tesmekta-d amek i d-yekker mmi-s d umecwar i yuɣ, iwakken ad yettikki deg lebni n tmaziɣt. Anemhal n yidles n Tizi wezzu, Lhadi Ould Ali, yemmeslay-d ɣef tallit-nni ideg yebda uselmed n tmaziɣt d tebɣest n yimenza s annar iwakken ad yerr tajmilt i Nour, yellan seg yimezwura. Lawan i d-ddukklen yimdanen ɣer lweɛda i d-yettwaheggan ɣef ṛṛuḥ n Nour, Nna Ɛelǧia, yemma-s n Lwennas tessenhez taswin s kra n yisefra i d-tewwi ama ɣef mmi-s neɣ ɣef wid teccelqef lmut ǧǧan-d deffir-sen taswin n tiyemmatin ttquddurent.
Sylia. M