Timlilit-nneɣ maci n wass-a-tt, acḥal d iseggasen-aya deg i d-nemlal, tessemlalaɣ-d tezdeg n wul d tin n wallaɣ.. Ayen akken cudden iseggasen d tiyersiwin, ayen akken i ɣ-ɛebban leɛwam d tiɛekkmin, din din yuɣal d afessas, am zun nɛawed-d talalit deg yiwen wass.. Tiṭ-nni yettnadin acḥal-aya win ara tt-yeččaren, tufa lemtel-is deg yezli-nni ttawint tlawin tiqbayliyin, s ut tfenṭazit, di tegnatin n liser yecban tigi: “ Aqlaɣ nettxeṭṭib ur nuyis, almi d adrar n at wweɣlis, wiyyak lḥemd a Rebbi, yufa ujeǧǧig lemtel-is”. Win ara k-yinin ur d-ttrusent ara lmalayekkat ɣer lqaɛa yeskaddeb-ak. Yal tikelt imi ara d-nemlil am ass-nni amezwaru, feggḍent tliwa n lehna deg wulawen-nneɣ, tlul-d tudert gar-aneɣ. Ssawlen-d iɛessasen n tmurt, d lawan ad nuɣal s ayen akken i ɣ-yessidiren: Lwerd deg ufus, ticemmuɛin uɣent di yal tiɣmert n wexxam, d asfillet i lxir, d lfal amerbuḥ ,“ Lɛeslama-m a tinna rujaɣ aṭas”. Ddeɛwa lxir s wurawen, kulci yettfeǧǧiǧ, kulci yettnur. Tafat tuɣ ak udmawen akken tuɣ deg wulawen-nneɣ. Awal yettazzal deg yiles am tala deg-i i d-nugem aman n tudert. Bnin i tmesliwt, ḥlaw i uɛaruḍ, am wid yurgan tafsut ufan-tt am akken i tt-yecna Muḥend Waɛli di “tebratin”: “ Ass amenzu di tefsut tameṭṭut-iw ɛzizen”. Lɛezza, leqdar, ccan, lferḥ, rrezg d uḥemmel, kra din yefti am wuftiyen ittewwan di tfeswin-nneɣ. Aseḍsu ineggi d sser n tmurt n leqbayel. Tuklal tudert win ara tt-yidiren d lemtel-is: D usu n leḥrir, d iles am tamment, d afus n lmalayekkat yesseɣraten imi ara mlilen at wulawen zeddigen, d imi n ljennet, d tamuɣli n wedfel yessexsin times yesserɣayen azeɣbub n usirem di tnariwin..
Zira