Teγzi n tudert tessawaḍ Bab-is ayen i d- yedder, ayen iwala yettuγal-as am win yeqqes uzrem, yettagad ula d aseγwen. Dayen i yettrebbin deg-s tamuγli meẓẓiyen i kra n win yugar di leεmer ad tafeḍ yesseḥbibir tettecbibir γef wayen yebγun yili-d. Qqaren, win yeddren tudert-is ulayγer yeqqules γer tudert n wayeḍ myal akud s tarwa-s, myal tarwa s tmuγli-s, yal tamuγli s wallalen-is. Gar umeẓyan d umeqran akud yettaf iman-is yettaḍsa yeqqar: wali tura wihin yugad teγzi n tudert, wihin yeqqar awah a teγzi n tudert maca γas tudert tesdukel-iten, tamuɣli tebḍa-ten, yal yiwen anida ijebbed. Netta akken bγun jebden i tudert ur ffiγen ara.Mgaraden amek ara idiren, d acu n tudert ara idiren. Netta limer d lebγi yal wa ad yidir i wayeḍ, s wayeḍ. Temẓi di temγer, temγer di temẓi mi ara dduklent ad d-fkent tamuγli n yimmal ara d- yezgen i kra n win yeddren, maca i sin d yid-sen tidet ẓẓayet, yuεer leḥsab i tifin…
Bujemεa: Iruḥ i kunwi? I wacu imi d-teqqimem? i nni ? Neɣ i tmeɣra?
Akli: Win yewwi nnεi yewwi-t, win i d-yegran Yeḥder i tmeɣra. Llan kra glan ula s lehna awer tuhennin
Dda Weεli: I yeẓran ala win yewwten d win yettewwten
Bujemεa: Γer tura tettmektayeḍ-tt-id?
Dda weεli: Amek ara ttuɣ tilelli, ula ɣas ass-n i tettwajleq gar yifassen-iw a tiγwisin-nni i
terfed akken.Nehzen idurar, mmsawalen igenwan, llin iẓekwan ttekfufulen-d idammen, imdanen uɣalen d iguji, d igugamen. Yessens-d fell-aɣ anza, anza anza (sleεyaḍ ) ulac win εzizen am tlelli, ulac win εzizen am tlelli (yeɣli ɣef tgecrar) ulac win εzizen am tlelli…(Tasusmi)
Bujemεa: (s ukukru) I syin akin
Akli: Tilelli tezweğ zwağ n tmara
Bujemεa: (s ukukru) I tura ihi amek?
Dda weεli: Amek, amek?
Akli: Ass-a ur d-yegri wamek
Dda weεli: Amek, amek?
Akli: Texleḍ temlel d tebrek.
Bujemεa: Yeεreq ur d-iban yixef-is
Akli: Atan yixef-is
Dda weεli: Anida-t?
Bujemεa: Amek-it?
Akli: D arbiεi
Bujemεa: Ahat d llğennet!
Dda weεli: (s uqesser di tidet)d lǧennet?! Ihi ass-n ara nemmet ad naf iheyya usummet
Akli: Awi-d ass-a
Dda weεli: Ass-a ad iεeddi akken yebγu yili. aεtur, d azekka amek ara yili?
Akli: Ur masriγ i uzekka ur d iyi-d-nettaf ara
Bujemεa: Atan ayenni tjehleḍ, yak lmut deg ufus n Rebbi i tella
Akli: I uzekka mačči deg ufus n Rebbi i yella. Twalam? Lḥeq-iw awi-t-iyi-t-tt-id ass-a ma d lḥeq-nnwen anfet-as ɣer seld azekka
Dda weεli: Yefka-d Rebbi lemziyya imdanen mačči akk am kečč, wannag ur ẓẓriɣ ara anida ara d nessiweḍ
Akli : Iεreq-ak neɣ tεegzeḍ ad t-id-kemmleḍ wammag: ur yettili ccer d nnḥas, wa d azgen, wa d aterras, gar-aneɣ ur nnbeṭṭ d tilas, ma tufiḍ gma-k yeɣli ad tbeddeḍ ɣer tama-s ad t-id-ssekreḍ, a mačči ad as-teččeḍ ayla-s
Bujemεa: Imdanen d ayetmaten, ass-n i d-lulen i ẓran ad mten, i wemgired aniwa i t- id-yessasen ?
Akli: D amdan
Dda weεli: Mazal ad nečč aɣrum! Tamuγli-ya-nnwen ugadeɣ ad aken-teğğ εeryan. iyi-
ɣaḍen widen ara d-teğğem akken, wamma kunwi ayen tzerεem welleh ar t-id-megrem
Akli: Ma qqaren imezwura lqella d lγella. nekk ad asen-iniɣ: lqella d lεella
Bujemεa: Ula d kečč, yeεdel umerkanti d uẓawali?
Akli: D acu i d amerkanti, d acu i d aẓawli?
(Bujemεa yeṭṭal γer Dda Weεli)
Dda weεli: D imdanen
Bujemεa: D imdanen!
Akli: Ulac win i d ak-d-yennan d zzwayel. Di leεnaya-k s anisa i d-tekk tawant?
(Bujemεa iruḥ ɣer Dda Weεli)
Dda Weεli: Deg tawant
Bujemεa: Deg tawnt!
Akli: I kečč s anisa i d-tekkiḍ?
(Bujemεa yezzi ɣer Dda Weεli)
Yettkemmil
Akli Tamazirt